*ْ:+*~ ياليلـــلة العيـــد آنستينا ~*+:ْ*

بكـــــــرة العيد ونعيد وندبحك ياشيخ سيد ((اشمعنى الشيخ سيد ؟؟معرفش مسكين والله الشيخ سيد دا))

......................................................

خلاص الوقت بيمر مفضلش حاجه العيد قرب

لأ وإيه مش أي عيد...

دا عيد اللحمــــــــــــــــــــــــــــــــــــــه

يعني من آخرها اللي ناوي يضحي بنفسه أقصد بنوع من أنواع البهايم واجب عليه يسيبلي حته

ويبعتهالي على الرابط دا:

http://www.5arooof.com/

واللي معرفش يقرا الرابط معناه

خروف دوت كوم

وإللي مش هيبعت هضحي بيه

.................................

المهم بقى أنا حابه أحكيلكوا على عيدي الظريف اللطيف وياريت تقروه للنهايه من غير ملل

...............

لغاية السنة اللي فاتت كان روتين العيد ولمدة 5 سنين هو هو

ومع كدا كان أحلى عيد مع إننا مش بنكون مع أهلنا

يعني لا تيته ولا جدو ولا إعمامنا ولا إخوالنا ولا أولادهم

بس بما إننا عمرنا ما عيدنا معاهم خلاص مش فارقه معانا

يمكن بزعل ويأثر فيا لما أسمع صحباتي وهما بيقولوا:

رحنا لجدي وكنا كلنا مجتمعين واتفسحنا .

ويفضلوا يحكو مغامراتهم

إنما أنا أفضل ساكته بسمعهم أنا وصحبتي إيمان الفلسطينيه

وعنينا تدمع من القهر ونسكت ونصبر بعض ونقول أكيد فيوم هنعيد معاهم...

هحكيلكوا بقى ايه هوا الروتين

الإسبوع اللي قبل العيد بنكون صايمين 9أيام الحج وماما بتبدأ تجهز عشان بسكوت العيد كل يوم نعمل نوع أو نوعين

زي البيتي فور4 وبيتكو فايف5 ههههه

وغريبه

وكحك بسكر

ولانك شاير

وبسكوت نشادر

وزيادة عليهم (معمول ) اللي بيكون بالتمر

هوا مش لازم في عيد اللحمه نعمل بسكوت بس احنا في بيتنا اتعودنا على كدا اصل انا واخواتي بنحبو وبننسفو فيومين.

بعد كدا بطلب من بابا يشتريلنا زينه وقبل العيد بيومين ببدأ أزوق البيت وأرتبه وأنظفه ونغسل لو في غسيل.

*ليلـــــــــــــــــــــة العيد*

بكون سهرانه أنا واخواتي مستحيل ننام

أنا أرتب في البيت شويه وأحضر هدومي واكسسواراتي واخطط لتسريحة شعري وأعمل بروفا لهيئتي

وافضل كدا لغاية صلاة الفجر وبابا وماما يصحوا وونسلم عليهم ونبوس راسهم وايديهم ويدونا العيديه

ونصلي الفجر

بعد الفجر بساعة تقريباً بنجهز نفسنا عشان نروح نصلي العيد في الجامع

ودي حاجه أساسيه في العيد بالنسبالي بحس العيد ملهوش لزمة من غير ماأصلي وأسمع الخطبتين

والناس بتوزع على الأطفال حلويات وفلوس عيديه ولما بشوف أختي الصغيرة وهي بتاخد أقول ياريتني كنت صغيرة ههههههههه

بعد ما بنرجع من الصلاة نفطر وبعدين أبدأ انا واختي نشيك نفسنا على سنجة عشرة

ولما تكون الساعه8:30 صباحاً

ترن ترن ترن التيليفون بيرن

أرد: السلام عليكم ايوه يارانيا

رانيا: يازفته انتي وهيا ماجيتوش ليه لغاية دلوقتي

أنا: ايه يارانيا الساعه لسا 8:30

رانيا: لما نشوف هتيجو امتى ياهانم انتي واختك ,عارفه لو الساعه بقت 9 وملقتكوش على الباب

هتشوفوا هيجرالكو ايه هـ...

أقاطعها :خلاص خلاص متزعليش نفسك هنيجي متخافيش

رانيا: يلا بسرعه

أنا: حاضر

رانيا: انتي لسا واقفه يلا

أنا:يلا يلا سلام

(طبعا لازم ناخد التهزيئه دي من رانيا كل عيد)

نلبس عباياتنا ونسلم على ماما ونكون آخدين معانا طبق بسكوت

وطع طع طااااااخ

افتحي يارانيا

تفتح ندخل بسرعه ونخلع العبايات ونسلم عليها بحرارة مع اننا كنا مع بعض من يوم ونديها البسكوت

ونزبط اللي اتبهدل من شياكتنا في الطريق

ونقعد وتقدملنا رانيا البسكوت اللي هما عملينو ونقول لبعض بسكوتنا احنا احلى

لأ احنا اللي احلى

آآآآآآآآآآآآآآآآآآآآآآه

(شغل عيال)

بس بجد بسكوت مامتها جنان

المهم نقضي الوقت شويه على الكمبيوتر وشويه رغي وشويه اكل

والعيد بتاعنا طبعا لا يخلو من دوريتوس الأزرق(لكل واحده فينا كيس حجم عائلي لوحدها) وبيبسي وجالكسي و.........الخ

طبعا مبنحصلش عليهم بسهوله لازم طلوع الروح عشان وزير الخارجيه أخوها يوافق

على الساعه واحدة الظهر نروح انا واختي البيت

ننام شويه

وعلى العصر رانيا تيجي

ولما بتيجي بنكون اشترينا بومب(طرطعان بالسعودي)

ونطلع السطح ويشتغل بقى القصف الاسرائيلي من انواع المتفجرات اقصد البومب الي صاروخ واللي كبريت

وبليل نولع اللي بينور في السما الوان

ونفضل كدا أربع ايام العيد منعتقش بعض لدرجة الأمهات بيزهقوا مننا

بس بصراحه بنستمتع ورانيا معوضانا عن فقدان الأهل والقرايب ههههههههه

لكن واااااااارانيااااااااااه

واحسرتااااه

رانيا مشت السنادي عشان الجامعه

وبقينا خلاص بلا رانيا = بلا أهل وقرايب.

مش عارفه هنعمل ايه في العيد دا من غيرها

هتقولولي اومال فين ايمان من الموال دا

اقولكو ايمان دي حكايتها حكايه ما متها عاملالها حظر تجول بس انا بحاول اليومين دول انها تيجيلي

أصل مش معقول يعني

.......

أما رانيا دي بقى توأمنا المصري انا واختي اتصاحبنا لمدة 5 سنين

وهي زي اختنا واكتر كمان

.......

ومعلش سوري طولت عليكو ياقرائي الأعزاء

يلا ياحلوين يارب يكون عيدكو لطيف وظريف

وكـــل سنة وانتو خرفان أقصد طيبين

سلااااااااااااااااااااااااااااااااااااااام

ألقاكم