**فـــــي مخيلتي**

* في مخيلتــــي*
هنــاك يسكن أعمــاق قلبي ذلك الكيان الذي أنا جزء منه..
بعيدة عنه افتقد شعور الإنتماء إليه والحاجة لأكون في احضانه..
فؤادي المكلوم يبكي دماً لا دمعاً كلما أحس بالغربة.. فأنا في كيان آخر
ولكن كيان لايعيرني أي اهتمام كيان اعتبر فيه كجرثومة..
أرى أفراده فيه فأغبطهم واحاكي قلبي ليلا أواه ياقلبي متى العودة إلى أرضك ياوطني..
متى سأشعر بدفيء أحضانك .. بحنانك .. وأمانك..
متى سأعامل بحب وبنظرات وكلمات أئلفها ..
متى سأمشي على أرضك ياوطني وأشعر بالعزة ويعتري الفرح كل كياني ؟؟
متى سأصرخ بأعلى صوتي فرحا وأقول أخيرا تحقق حلمي؟؟
...
وتحقق الحلم ..
وصرخت بأعلى صوتي ولكن ليس فرحاً بل حزنا لما لقيت.........
وكأنني لست جزء منك ياوطني.. لم أعامل فيك كغريبة؟
لم ينبذني الناس؟
مــــــــــــاذا فعلت؟؟؟؟
هل ذنبي أني اضطررت لتركك؟؟
أنا لست غريبة .. أنا لست وافدة كما يقولون..أنا منك ولك لقد ولدت فيك .. تركتك ولكني عدت إليك..
اوااه ياقلبي أواااه..
يالكِ من حمقــاء يا مخيلتي اطعت وغفوت معك وحلمت حلمت حلمت إلى أن صعدت بي أحلامي للسمـــاء
ولم أفــق إلا عندمـــا وقعت صريعة أحلامي...
لا تبكي ياعيوني لا تحزن ياقلبــــي..
ولتبقيا على أمـــل فغــدا بإذن اللــه أفضل..
أقولها بصوت عـــال:
لـــو لــم أكــن مصريـــاً ... لوددت ان أكـــون مصــريــاً..
ـــــــــــــــ
بعد غياب طويل رجعت اليكم..
ولكن لا اعدكم اني سأبقى معكم كثيرا..
ـــــــــــــ
وسأحكي لكم ما حدث خلال غيابي باختصار
اجابة لطلب المدون الشاعر الحزين
ـــــــــــــ
ألقـــــاكم أحبتي في اللــــه

بسمة صــلاح

لسا في حد هنا؟؟

لسا في حد في العالم التدويني دا؟؟؟

مش عارفة ياترى لو رجعت تاني هلاقيكوا
ولا هكون لوحدي؟؟؟

بسمة بلا شيماء كالسمكـة بلا مـاء+ نتيجة التنسيق

بسمــة بلا شيمـــاء كالسمكـــة بلا مـــاء
+نتيجة التنسيق

بــابـــا ومـــامـــا حبايبي وأخواتي سافروا من يومين عشان يرجعوا السعودية
وبجد كان من أصعب وأقسى الأيام اللي مرت عليا في حياتي
لإني كنت جزء من كيان واحد متحد
بيحب بعضه وميقدرش يتفكك لكن حصل اللي ربنا قدره...
بكيت لدرجة إني مكنتش حاسة بنفسي
أبكي واسكت وأرجع أبكي تاني
بطريقة هيستيرية....
بابا مرضيش يسلم عليا عشان حبس دموعه ومشي بسرعة
ماما فضلت حضناني أوي
شوشو فضلت تقول خدوها معانا متسيبوهاش
أنا هموت من غيرها
وعياطها كان واصل في العمارة كلها..
بعد ما مشيوا فضلت قاعدة في الشقة لوحدي عشان أحس إنهم لسا معايا
بعد كدا لما حسيت إني خلاص ممكن يغمى عليا ومحدش هيلحقني
أخدت نفسي وعلى تيتة وجدو على طول...
إحساسي بالحزن والألم مش قادرة أوصفه بس هستحمل لإني أنا اللي اخترت كدا
وهرفع راسهم بإذن اللـــــه...
ــــــــــــــــــــــــ
فراقهم كلهم كوم وفراق شيماء (شوشو هانم) كوم تاني لوحده
شيماء دي أختي اللي بعدي على طول
أنا أكبر منها بسنتين
لكن كنا مرتبطين ببعض ارتباط الكل كان بيستغربه وكإننا توأم حقيقي
دايما بيقولوا الإخوات مبيتفقوش ودا فعلا الغالب بين الإخوات
لكن أنا وشيما كان لينا مملكة خاصة بينا
أغلب كلامنا كان بيطلع مننا في نفس الوقت ونفس اللفظ
تفكيرنا تفكير واحد مفيش أي اختلاف مابينا
ودايما كنا بنتحسد على حبنا لبعض...
ـــــــــــــــــــــ
شيماء ياحبيبتي مين اللي هياخدني في حضنه ويطبطب عليا بعدك؟؟؟
مين اللي هيشاركني كل لحظة في حياتي ويحسها زيي وأكتر مني زيك؟؟؟
مين اللي هيشاركني كل لحظة في حياتي ويحسها زيي وأكتر مني زيك؟؟؟
مين اللي هيناكف فيا ويرخم عليا بدمه الخفيف زيك؟؟؟
مين اللي هيشتري معايا الشيبس العائلي والكانز وناكله سوا؟؟؟
مين اللي هتجري عليها في المدرسه كل حصة وحصة وفي الفسحة ولما نروح البيت؟؟؟
مين اللي كل ما ننطق نفس الكلمة يحط صباعه على صباعي ونقول مع يعض آآآآآووووسسس؟؟؟
مين ياشمقمق اللي هيبوز اكسسوراتي وتوكي؟؟؟
مين اللي هينقيلي الطقم اللي هلبسه قبل ما أخرج؟؟؟
مين اللي هيقولي نقابك مزبوط؟؟
مين ومين ومين ومين
خايفة عليكي ياحبيبتي من غيري حاسة انك بنتي الصغيرة اللي كنت بحميها وبحرسها..,
ياحياتي عمر ماحد هيحتل مكانك ولا هيقدر يوصله..
شيماء فاكرة لما قلتلك بسمة بلا شيماء كالسمكة بلا ماء
أنا بجد دلوقتي كدا..
خيالك معايا في كل مكان...
أنـــا متدمرة أوي
زي الطفل اللي فقد أمه...
ربنا يجمعني بيكوا على خير
مشتقالكوا شوق مالوش حد...

ـــــــــــــــــــــــ
آسفة ياجماعة على البوست الطويل بس أنا بفضفض ودا من حقي
عارفه ان في ناس بتطنش ومش بتقرا للآخر بس دا ميهمنيش
المهم اني فضفضت ...
ــــــــ
حبيت أطمن اللي سألوا عني وكانوا عايزين يعرفوا نتيجة التنسيق إيه
أنا الحمد لله اتحقق حلمي ودخلت في جامعة الأزهر دراسات إسلامية شعبة إعلام وصحافة
دعواتكوا ليا ربنا يصبرني ويوفقني ويحميني من كل شر وسوء...

ألقاكم أحبتـــي في اللــــه
تحيــــــ بسومـــــة النعـــــومـــة ـــاتي(:

بوست مكنش بوست

أعيتني الحيل مع النت

وبقيت أشد في شعري

في الأساس الرسمة دي اللي أبدعتها أناملي وبكل فخر

هههههههههههه

رسمتها

تهنئة" لمجلتنا رؤية مصرية"

عشان العيد حاولت ابعتها بالميل مفيش فايده ..

ولا أي طريقة نفعت إني ابعتها أبدا ..

من قهري على الرسمة وان عدد المجلة نزل وأنا مبعتهاش

ملقيتش طريقة غير إني

أعييييييييييييييييييييييييييييط

فكرت @فكرت@ فكرت

قلت مفيش حل غير إني أحطها بوست

وأقول لرئيس التحرير إبراهيم العدوي

وهو ياخدها من هنــــــــــــــــا

وبعدين احذف البوست..

ياسلااااااااااااام إنما أنا ذكية ذكاء..

*المهم*

بما إن أنوس عاشقة الأحزان حبيبة قلبي

علقت فهضطر اخلي البوست

وطبعا كل سنة وانتوا طيبين واحد واحد

وواحشني جدا والله على اشتياقي لكم شهيد

وأكيد هتعذروني عشان أنا غصب عني مقصرة

وهسافر بعد شوية القاهرة عشان اشووووووووف التنسيق بيه مش راضي يظهرلي نتيجتي ليه

وأقدم والكلام دا

دعواتكوا بجد من قلبكوا

وقوليلي ايه رايكوا في الرسمة ؟؟؟؟؟

عيــــــــد سعيد وأكرم وأيمن ومحمد وأحمد والشلــة كلها

هع هع هع هع

وكل سنة وانتوا تيبيييييين

ألقاكم أحبتي في الله

تحيــــ بسومة النعومة ـــاتي(:

عـــااااايزة أرجـــع السعــوديييييية

عـــــايزة أرجـــع السعــوديييييييييية

ــــــــــــــــــــــــــــــــــــــــ

كــــــل عام وأنتـــم بخير

رمضـــــــان كريم

ربنا يتقبل منا منكم صالح الأعمال

أنا متأسفه لإنها جت متأخره قوي

بس والله ربنا عالم بظروفي الواحد بيجي مصر مبيبقاش فاضي خالص

طبعا دا أول رمضــان ليا في مصر وانا واعية

لاني اخر مرة كنت فيها هنا في رمضان كان عندي 4 سنين أو 5 سنين

جو مصر غير السعودية خالص مالص

هنا في فوانيس والشوراع مزينه وفي مسحراتي وأهم حاجه لمة العيلة على سفرة واحده

بس للأسف لقيت نفسي مع دا كلـــه مشتاقة للسعودية ونفسي ارجعلها

حاولت اكّدب نفسي واحساسي بس مقدرتش

بجد وحشاني السعودية وكل حاجه فيها واصحابي اكتر حاجه واحشني فيها

مفتقده الجو الروحاني وصلاة التراويح في الجامع

اللي مش بقدر اصليها هنا غير لوحدي في البيت

كمان هناك كنت بقدر اتواصل معاكوا عن طريق النت

وهنا مش بقدر اقعد دقيقتين على بعض غير بالعافيه

لدرجة انكوا نسيتوني ومحدش بقى بيسأل عني خالص

ودي حاجه بجد وجعتني جدا

لكن ان شاء الله هحاول ارجع لمدونتي تاني

لإني مفتقداها أوي وانتوا وحشتوني جدا جدا

ادعولي نتيجة التنسيق تظهر زي ما انا عايزاها لإنها لسا مظهرتش

وكــــــــل رمضــــــان وانتـــــوا طيبين

ألقــــــاكم أحبتي في اللــــه

تحيــــــــ بســــــــــــومـــة ــــاتي(:

اشتقتـــ

اشتقــتــــ ...

اشتقت الى العالم الذي أجد فيه أنـــا ذاتي .. ولكن ما باليد حيلة ...

أحببت أن أطمئنكم عليّ ... وحتى ييسر الله أمري

ألقــاكـــم أحبتي في الـلــه..

في رعاية الرحمـــن..

تحيـــــــــــــــــــ بســومةــاتي (:

مصر هتنور .. مش عارفه مالي

مصـــــــــــــر هتنور.. مش عارفه مالـــي):

لو فضلت أقول وحشتوني بجد مش هيكفيني لإن عالم التدوين كله وحشني

بس غيابي دا غصب عني سواء كانت ظروف معنوية نفسية أو حسية...

ان شاء الله لما تلاقوا مصر منورة كدا الاسبوع اللي جاي

اعرفوا اني خطيت رمالها بقدماي هههههههههههههههههه

دا بوست خفيف كدا لإني بجد مش فاضيه خالص
طبعا بنجهز تجهيزات السفر عشان هنسافر الاربعاء ان شاء الله اللي هو انهرده 22/7/2009

دا لو محصلش أي ظرف يعطلنا زي العربيه مثلا اللي بابا بيشيك عليها والكلام دا..
طبعا اخدت نتيجة الثانويه العامه كلها " تاني ثانوي وثالث ثانوي" جبت نسبة 97ونص% صحيح مش النسبه اللي تشرف وتفرح بس الحمد لله على كل حال..
أما نسبة " ثالث ثانوي" لوحده 98ونص% ...
أما امتحان القدرات دا بقى عكيت عك معكعك ع الآخر ..كل المسائل الرياضيه معرفتش احل ولا واحده منهم
واخترت الاختيارات بالحظ وكإني بلعب لعبة ههههههههههههههههه..
صحيح والله شر البلية مايضحك..
المهم والزبده على رأي السعوديين امبارح طلعت نتيحة القدرات وجبت 82% شفتوا الخيبة التقيله
بس الحمد لله أنا كنت متوقعه اني أكتر حاجه ممكن أجيبها 50% لكن ربنا كرمني لإن الكل دعالي الحمد لله
بس ربنا يستر لما النسبتين يتجمعوا هتطلع في النهاية ايه...
أنا نفسي أدخل صحافة في القاهرة جامعة أزهر ان شاء الله وربنا ييسر بجد خايفة آخد على راسي في الآخر ههههه..
الغريب إني كل سنه كنت بجهز شنطتي قبل السفر بـ3 أسابيع وماما تفضل تزعقلي
لكن السنه دي غير خالص مجهزتش الشنطه غير امبارح والله ..

مش عارفه مالي مش فرحانه زي كل سنة إني نازلة مصر مخنوقة بس مش عارفه السبب ..
مش حاسه بالحماس بتاع كل سنة كل اللي عرفاه اني خايفه لكن من ايه مش عارفه..
مش عايزة أقول ايه شعوري لما ودعت صحبات عمري 12 سنه مع بعض لإن الكلام مش هيعبر عن حجم الألم اللي جوايا..
إيمـــــان روحي الفلسطينية موني توأمي الفلسطيني..

و إيمان السعوديه كمونة توأمي السعودي..

بجد قلبي وجعني وكنت بموت وأنا بسلم عليهم بس مبكيتش وخليت بكايا بيني وبين نفسي..

لكن هفضل زي ما أنا عندي أمل أشوفهم تاني مفيش حاجة صعبة على ربنا..
رانيــــــا صاحبتي اللي في مقام أختي الكبيرة بجد ودعتها بس حسيت إني هشوفها تاني لإننا في مصر سوا..
متخافيش يارنيوتي هنفذ الوعد اللي وعدتك بيه ههههههههههههههههههههههههههه..
أهم حاجة عندي دلوقتي إننــا نوصل الأراضي المصرية بسلام آمنين ادعولنـــا كتير جدا نوصل بالسلامه..
بشكر من قلبي اللي سألوا عني في غيابي البت نصي بسمـــه أنور

..جودي روح قلبي...وmarmar حياتي...وعاشقة الأحزان أنوسة حبيبتي..
و مصعب صلاح الكاتب الكبير الصغنن.. وelsha3er ...

وعاشقة الرومانسية دودو القمر...وmohamed ghaliah
ربنا يسعدكوا يارب بجد فرحتوني جدا...
طبعا عقبال ما نسافر وننزل مصر ونستقر وبابا بفكر يركبلنا النت

الحكايه دي هتاخد وقت ادعولنا نركب النت بسرعة
عشان اقدر اتواصل معاكوا...
ملحوظه صغننه : أنا وشوشو هانم بننشر الفساد في الأرض على رأي ماما وبابا ههههههههههههه

وخلينا رانيـــا تعمل مدونة المهم بقى انكوا تتعبوا نفسكوا وتدخلوا اللينك بتاع مدونتها

عشان خاطري عشان خاطري عشان خاطري

وتقرأوا البوست بتاعها وتعلقولها هو بوست صغنون أوي

معلش بقى أنا مسافره متزعلونيش واسمعوا الكلام ومتناكفوش

هههههههههههههههههههههههه
أشوف تعليقاتكوا عندها ياكدعان انتشروا يلاااااااااااااا

بحبكــــــــــــــــــــــــــــــــــوا أوووووووووووووووووووووي

انتظروا أول بوست وأنا في أحضان الوطن...

كانت معكم من قلب الحدث بسمــــة صــــلاح
هههههههههههه

ألقـــــــــــــــاكـــــم أحبتي في اللـــــــــــــــــــــــــه

تحيــــــــــــــ بســومة النعــومـة ـــــاتي(:

التعليقــــــــــــــــــات من هنـــا أو من فوق البوست

والتهمــــني القمـــر

والتهمنـــــي القمــــر

بداية بشكر كل واحد علق عندي وسأل عني واهتم بيا

بجد بجد انا بحبكوا اوي اوي

وبفرح اوي لما بلاقيكوا بتيجوا تسألوا عني حتى ولو مكنتش منزلة بوست جديد

ربنا يسعدكوا يارب

ــــــــــــــــــــــــــــــــــــــ

"والتهمنــــــــــــي القمــر"

أخبرتني عجوز تبدو عليها سمات الشــر بأن القمــر أصبح وحش الزمــان , وأنه يلتهم النــاس

في كل مكان , لــم أصدق كلام العجــوز ولكن القمر ظهـر وبان , وفي فمــه الخالي من الأسنان ..

أمــام عيني ألقــى فيه إنســان ...
ارتعشت خوفــا وأحسست وقتهــا بفقد الأمـــان ...
" وخير اللهم اجعله خير"

دا الحلم اللي حلمته انهرده بصراحة مش عارفه أنا كنت من ضمن اللي القمر الجعان أكلهم ولا لأ...
ههههههههههههههههههههههه
رغم إني صحيت مخضوضة إلاّ إن الحلم يوقع من الدحك

دا حتى في الكارتون مفيش حاجة زي كدا مش عارفة الأحلام العجيبة دي بتيجي منين...
بس والله فعلا دا الحـــلم..

ـــــــــــــــــــــــ
طبعا دا بوست كدا عن أحوال الطقس بتاعتي الفترة دي نفسيتي تعبانة جدا جدا جدا
توتـر ـ خــوفـ ـ ألـــم ـ حـــزن ـ تشــتت ـ حطــــام
حاجات كتير بتحصل حواليــا مأثــرة عليا ومدمراني تدمير شــامل بمعنى الكلمه..
سبحان الله الواحد بيكون قاعد في أمان الله وتجيله المصيبة ..
بس دا قدر وامتحان من ربنا والواحد لازم يرضى وينجح في الصبر على أي بلاء..
أنا مش عارفة هيحصل ايه بعد الإمتحانات ما تخلص

أولا عندي امتحان قدرات ودا بيقيسوا فيه قدرات الطالب ويكملوا بنتيجته نتيجة الثانوية

غير كدا لازم ننقل من بيتنا عشان مالك البيت زود الإيجار لمبلغ عالي جدا البيت ميستحقهوش

يوم الأربع من الإسبوع الجاي آخر يوم أشوف فيه صديقات عمري اللي درست معاهم 12 سنة كاملين

ياترى اليوم دا هيحصلي في ايه؟؟

ياترى هذاكر عشان امتحان القدرات ازاي وهحله ازاي

ياترى هننقل من البيت ازاي .. البيت اللي بعشقه بجد

البيت اللي ربنا حققلي فيه حلم كان من أحلى وأهم أحلامي

" أوضتي البمبيه" اللي بعشقها ازاي همشي واسيبها كدا بكل سهولة؟؟..

السطح حبيبي اللي لما بحس بالخنقه بطلع وحدي

واقعد فيه لحد بليل واحس بالراحه فيه لما بناجي ربنا

كل مكان في البيت ليه ذكرى مميزة معايا

ازاي هقدر اسيبه ازاي

ياترى ايه الجامعه اللي هدخلها ؟؟

ولا مش هدخل جامعه ؟؟

ولا هيحصل ايه ومستقبلي هيكون شكله ايه؟؟

ياترى هموت قبل دا كله ؟؟؟؟

والله شكلي لا يسر عدو ولا حبيب

شبه ميته بجد

عمي لما شافني قال لإخواتي انتوا طلعتوها من القبر تاني ليه دي

رجعوها رجعوها

ههههههههههههههه

والله ياعمو انت ظريف

ــــــــــــــــــ

......

مفيش غير اني أقول

آآآآآآآآآآآآآآآآآآآآآآآه ياربي آه

ارحمني وخفف عني وحل كل مشاكلي وساعدني أخلص امتحاناتي على خير
واجيب نسبه ارفع بيها راسي قدام الكل
وافرح بيها كل اللي بيحبوني ومهتمين بيا..
ارجوك يارب اشفيني ويسر لي كل عسير وخليك معايا في كل خطوة
أنا محتجالك أوي ياربي
مش هشكي لحد غيرك تاني
ولو شكيت على سبيل الفضفضة
هشكي لقلمي الناس كل واحد مشغول بمشاكله
وهمومه ومحدش فاضي لحد
عشان لو شلت جوايا ممكن انفجر..
لكن مع كل دا أنا مش هعترض على أقدارك أبدا
أنا مؤمنة بيك ومش هفقد الأمل
اغفرلي يارب لو كنت في يوم اعترضت .. سامحني وارحمني برحمتك
أنا عبدتك الضعيفة الذليلة...

ــــــــــــــــــــــــــــــــــ
يوم السبت اللي فات كان احساسي ان كل دموع الدنيا ولا حاجة قدام دموعي

ياترى هو كل واحد يكون في اخر سنة مدرسه بتكون حالته كدا؟؟؟؟؟

بس على الأقل اللي في بلده في امكانية يتواصل مع اصحابه ويشوفهم

لكن أنا هشوفهم فين تاني؟؟؟

هنتلم كلنا ازاي تاني؟؟؟
هنلعب سوى ونرخم على بعض ازاي تاني؟؟؟
كل دا كوم
وفراقي لتوأمي روح قلبي كوم تاني لوحده وهم لوحده

آأأأه يا موني حتى اسم مدونتك وجع قلبي ياشيخه

صاحبة مدونة ليت الزمن يرجع وارجع انا وياه

ياترى يا إيمان هنشوف بعض ازاي تاني ؟؟؟

عارفه اننا هنقول فينك يا ايام زمان

ليت الزمن يرجع ونرجع احنا وياه

بت يا موني^_*

انتي رايحه فلسطين .. خدييني معاكي بأه بالمره وشليني في الشنطه
ومحدش هياخد باله ونريح نفسنا من الغم دا
هههههههههههههه

.......

آآآآآه
يـــــــــــــاترى ايه اللي مكتوب ومقدر عليا
كل اللي بتمناه انه يكون خير

.....
ادعولي ياجماعه دعاء المسلم لأخيه المسلم في الغيب مستجاب..

ــــــ
طبعا عن أخبار امتحاناتي
فالحمد لله حليت حلو أوي في
البلاغة والقراءات لللأئمه السبعه والنحو والصرف والإنجلش والفقه والحاسب الآلي

وبكره عندي امتحان تاريخ آل سعود
بما إني في السعودية فبدرس التاريخ بتاعهم وصعب جدا جدا
وربنا يعين واحل بكره
وسوري اني طولت عليكوا
بس مدونتي بأه وبفضفض فيها ولا ممنوع (وش معصب)
ههههههههههههههه

ألقـــــاكم أحبتي في اللــــــــــــــــــه
تحيـــ بســومــة ــاتي(:

يانا يانا يانا الإمتحانات جيانا جيانا

يـــانا يانــــا يانــا الامتحــــانات جيـــانا جيـــانا

السلام عليكم ورحمة اللــه وبركاته

أخباركوا ايه ياجماعه

وازيكوا ازيكوا انا جايه انهرده اقولكوا اني هغيب شهر عنكوا ...
شفتوا شهر بحاله وربنا هتوحشوني قوي ..
خلي السلامات على جنب دلوقتي..

البوست طويل حبة وبجد عيزاكوا تكملوه للآخر ومتزهقوش..

أنا بأه حابه أحكيلكوا عن مودي في الإمتحانات وطريقة مذاكرتي يعني كفضفضة وكمذكرة في مدونتي في نفس الوقت..
طبعا أنا فاضل على امتحاناتي اسبوعين وشوية... وهتبدأ ان شاء الله يوم 27_6_1430 هجري (احسبوها ميلادي بأه)..
خايفة جدا جدا جدا بس كل ما بفكر إن في امتحان آخره وأهم من دا بحس بتفاهة الإمتحانات دي

بس بردو خايفة
لإن في ناس مستنين يسمعوا عني أخبار حلوة ونسبة ترفع راسهم
أولهم أغلى إنسانة " تيتـــة حبيبة قلبي من جوا"
والعيلة الكريمة كلها.. أجدادي ربنا يطول في عمرهم وعيالهم بأه..
ونفسي أثبت لناس إني قدها وقدود
بس بردو خااااااااااااااااااااايفة ومليش غير ربنا
ثم دعوات أغلى الناس
ادعولي ربنا يسعدكم
ـــــــــــــ
أقول لكوا إزاي بذاكر::..

طبعا لازم ارتب الأوضه عشان المظهر الجمالي والنفسية تكون مرتاحة لما تشوف الدنيا مرتبه حواليها

وممكن برش معطر جو أو بارفان...

طبعا بحب أذاكر وأنا قاعدة على سريري (قعدتي المفضله) وبرتب الكتب في جنب والدفاتر في جنب

وطبعا قلم رصاص وبراية وقلم سائل (نوع معين مش أي نوع) وجنبي علبة كلينكس (مناديل) والموبايل

عشان أسمع أناشيدي المفضلة.. وطبعا اسمي الله واقول شوية ادعية وأذكار

وأبدأ مذاكرتي لازم افهم بعدين احفظ بس بعيد على المعلومة كتير لإني نساية أوووووي

وربنا يعيني على المشكل هدي فلقيت حل كدا يساعدني اني افتكر وبصراحة بيساعدني كويس يعني

وهو " برسم لكل كلمة على حسب معناها يعني مثلا: لو في مادة الجغرافيا

قالي في الصيف تتساقط الأمطار ... برسم شمس صغننه عند كلمة الصيف يعني تدل على الصيف

وارسم قطرات مطر صغننه كتيرة وزي كدا يعني.....

بس بتساعدني اوي اوي اوي وبفتكر الرسمات يوم الإمتحان واحل الحمد لله

بس طبعا رسم أي كلام مش مزبوط ودي اكزامبل قدامكوا......

طبعا بسرح كتير وأنا بذاكر وبرسم رسمات ملهاش علاقة بالمذاكرة

أو اكتب اسمي بكل اللغات (البت مثقفه أوي يعني)..
أو أكتب أدعية ...وكدا يعني... ولما بلاقي نفسي تعبت من المذاكره

بهرب للمطبخ واعمل نسكافيه .. كابيتشينو.. سادنويتش.. قهوة بحليب.. كورن فليكس لو في...
ومش ببطل رغي أنا و"شوشو هانم" البت شيماء أختي يعني... لدرجة ان ماما

بتخلي كل واحدة تقعد في أوضه لوحدها
وووووووووووووووووووووواء
وأرجع أكمل مذاكرة ومن إحدى طرق الهرب بردو ...

المــــــراية اسرح شويه وارجع وارجعلها تاني ... عبط ع الآخر يعني...

بس والله مرة قررت ازاكر على تربيزة وحطيتها قدام المرايه عشان أشوف نفسي وأنا بذاكر

ولما لقيت نفسي اتشغلت خالص حلفت اقوم من المكان دا ...

"كان عندي حالة جنان بالمرايه بس الحمد لله خفت خالص عن الأول"
ههههههههههههههههههههههه ربنا يهدي... مين يابنات بيعمل زيي كدا اعترفوا اعترفوا..
اه نكمل بأه .. طول الوقت اتصل أنا وموني روح قلبي "إيمان روحي" على بعض ونسأل بعض كل شوية ..

هــا وصلتي فين؟؟ أي صفحة؟ السطر الكام؟؟

وماما بأه بتتنرفز وتمسح بكرامتي الأرض أنا وهي بس لزمن لزمن نتصل على بعض

ممكن في الخباثه كمان نياهاهاهاهاها

ممكن يعدي الوقت وألاقي نفسي فاضلي صفح متلتلة ومخلصتش

فاتصل على موني وأقولها بت يا إيمان ايه رأيك ننهف في عقولنا ونجازف تقولي مفيش قدامنا غير هيك يا سومه

..والعكس صحيح..
والمجازفة دي اللي هي يعني لغةً: المخاطره بالنفس..
اصطلاحا: نزاكر الحاجات اللي نحسها مهمه أو من أسئلة الكتاب وبس هئ هئ هئ ..
ولما نروح الإمتحان بنبقى تك تك تك تك تك نرجف ونضحك بشكل هستيري

وإيمان تقولي : عمرك شفتي حد يروح للموت برجليه.. أرد عليها وأقولها: آآآآآآآآآآآآآه المهابيل اللي زينا...
تقولي: ماعمو قال اقعدوا في البيت احسن بلا مذاكرة بلا وجع قلب (عمو دا اللي هو باباتي يعني بابايا)
أقولها: راجل كله نظر والله..ههههههههههههههههههههه
نطلع بأه لقدرنا والمراقبين يفتشونا عشان البراشيم وطبعا مفيش حد بيغش

اللهم بس ممكن واحده تقول كلمة بصوت واطي وبتكون صعبه بردو...

في الإمتحان طبعا لزمن ناخد معانا كمية كبيرة من المناديل

عشان الحنفيات اللي بتتفتح لما تلاقي أسئلة صعبة (الحنفيات دي عنينا يعني) والله مرة عيطت لمدة ساعتين

كاملين متواصلين بدون فواصل ولا اعلانات هع هع هع بس طبعا بعدها

قمت ووقعت من طولي كان يوم مايعلم بيه الا ربنا...
بتفق أنا وموني إن اللي تخلص فينا يا إما تعمل نفسها بتعطس أو تكح ..

ولو واحده قعدت لوحدها في اللجنة ولسا بتحل التانيه تقعد وتعمل نفسها

بردو عندها مشكله عشان نفضل مع بعض...حب ياناس حب (قولوا ماشاء الله تبارك الله)

اخاف تحسدونا...هههههههههههه

وتربيزتي اللي بقعد عليها ايام الإمتحانات مبتخرجش سليمه

إلا وكلها رسم من كل الأنواع كل يوم برسم رسمه عليها

بعد الامتحان بنطلع مدغدغين ومهدودين كإننا كنا في مصارعه

وشيماء تجري علينا مبتسمه وتقول: ها عملتوا ايه..
أنا بأه حركتي المعتادة بكل تريقه بقول: هه عكينا طبعا الحمد لله قدر الله ماشاء فعل..

ونبدأ نراجع المادة التانية لو في لجنة تانيه..
بعد مانخلص نتخانق مين اللي تروح تتصل على بابا عشان يجي ياخد التلاته الحلوين (بسمه,إيمان,الشيماء)
وقبل ماتنزل ايمان من العربيه نسأل بعض هنام ولا هنزاكر ونتفق يعني...

ــــــــــ

وكفاية رغي كدا أنا طولت أوي عليكوا

هتوحشوني أوي جدا موت في الفترة اللي جاية دي

وبجد محتاجة تدعولي أنا والحلوين بتوعي المذكورين أعلاه

ومتنسونيش يعني شقروا كدا واسألوا مش لازم يعني أنزل بوست عشان تيجوا

وبجد اسفة إني مقصرة في حق مدوناتكوا بس غصب عني أكيد

أخلص بس وأرجعلكوا ان شاء الله وأعمل العمايل

بس ادعوا ربنا يعدي الشهر دا على خير وييسرلي ويسهل عليا الامتحانات

خنقتي والضغوط النفسية الكتيرة اللي عليا

(الصور دي بكامتي والكتب دي كتبي أنا)

ودي هدية جودي حبيبة قلبي وصاحبتي الغالي عشان التعليق الأول

يارب تعجبك يا جـــــودي

.............

ألقـــــاكم أحبتـــي في اللـــه

تحيـــــ بســـومــةـــاتي

مجرد طلب من أختكوا الصغننة

طبعا الهدية لأستاذ آدم عشان لحق أول تعليق عندي البوست اللي فات

تورته بحالها يا استاذ آدم بالهنا والشفا

عشان تعرفوا اني أنا كريمة وسخيه

هع هع هع

لما نشوف مين سعيد الحظ المره دي

ــــــــــــــــــــــــ

الطلب بقـــــى:

طبعا

العدد الثامن لمجلة رؤية نزل

اقرؤوا لي هي والقـــــــــدر الجزء التاني

ودا لينك الجزء الأول هي والقـــــــدر

ياريت تقرؤوا قصتي وتقولولي رايكوا فيها بتعليقاتكم في المجله وارفعوا روحي المعنويه بلاش تحطيم ياجماعه

واللي مقرأش البوست اللي فات يقرأه ويعلق عشان مضربهوش

دا أمر

ولو لقيتوني غبت عنكم اعرفوا ان بابا وماما شالوا الدي اس ال

بالعربي النت عشان المذاكرة دعواتك ربنا يفرجها

ونخلص السنه دي على خير

بحبـــكوا في الله

ألقاكم أحبتي

حبيبي اللي خنته...

حبيته من كل قلبي .. رفيقي في وحدتي انيسي في لياليا مكب همومي وأفراحي.. فضلنا مع بعض سنتين ونص نتقاسم لحظات حزننا

وفرحنا أوقات كتيرة كان سبب سعادتي وأوقات كان سبب تعكير صفوي.. استحملني كتير وأنا بردو استحملته.. و حافظت عليه بكل ما

أملك ..بس ..بس يالا الأسف قررت خلاص أشوف غيره.. هو من يوم ما عرف بدأ يتغير مبقاش هوا حس بخيانتي بس للأسف غصب عني

نفسي بجد تسامحني يا موبايلي القديم يابيبرس(دا اسم الموبايل انا مسمياه بيبرس) أنا آسفة إني جبت غيرك لإني بجد محتاجاه أصل انت بقيت تعلق كتير وكمان صوتك واطي

وقليل الأدب( ههههه) ومش معاك سماعات ومميزاتك قليلة بس ياحبيبي مش معنى إني جبت غيرك يبقى هسيبك لأ هتفضل معايا

وعمري ما هفرط فيك أنا بحبك ومش هستغنى عنك لو مهما يحصل انت الحبيب الأولاني وما الحب إلا للحبيب الأولي ..

طبعا أنا جبت موبايل جديد وفرحانه بيه مع إنه مكنش عاجبني في الأول بس مش قادرة احط فيه الشريحه ولا استخدمه لإني مش قادرة

اسيب موبايلي ((الدمعه)) القديم ..شفتوا الإخلاص.. ربنا ييسر واستخدم موبايلي الجديد اللي ظلمته...

دي صور موبايلي الكديد n81

ان 81

دا كفر بيحمي الموبايل حطيتله استيكرز تويتي لإني بحب الكتاكيت أوي ولإني مش قادرة احطله كريستال زي القديم لإن دا حساس أوي وممكن يبوظ

ياخسارة الكريستال اللي عندي ..

هوا دا الكريستال اللي بقاله عندي شهور مستني الموبايل بس اتاريني هجيب موبايل غير اللي كنت عايزاه

اكيد هتستغربوا أنا ليه بكتب و بصور كل حاجه وبس وليه بحطها في المدونة .. الجواب لإني بعتبر المدونة هي أنا ..

بحط فيها كل حاجة تخصني بس...

ــــــــــــــــــــــــــــــــــــــــــــــــــــــــــــــــــــــ

ملاحظة: بتمنى اللي ليه علاقة ببنوتة صاحبة مدونة ورقة وقلم يسلملي عليها أوي ويقولها إني معلقتلهاش في بوستها الأخير لإن بابا وماما كانوا شايلين النت عشان المذاكرة وبجد زعلت جدا لما عرفت انها قفلت مدونتها بس ربنا يوفقها في دراستها وتنجح يارب

ـــــــــــــــــــــــــــــــــــــــ

تاني حاجة:

صاحبتنا إيمان السعودية جت سلمت عليا أنا وإيمان الفلسطينية طلباً للصلح وطبعا مدينالها ايدينا وأهلا وسهلا بيها في أي وقت

والحمد لله انا مبسوطة عشان هي عرفت إن أنا مغلطتش في حقها وإنها كانت ظلماني

ربنا مايجيب زعل ولا خصام بين أي حد

يارب

وسلااااااااااااااام

ألقـــــــــــــــــــاكـــــــــــــــــــــــم

مبسووووطة أووووي

البوست اللي فات كان عنوانه "مخنوقه أووي" بس الحمد لله ربنا فك الخنقة دي بأحلى فسحة ياااااااااااه اتبسطت أووووووي
يمكن شوشو هانم كتبت عن الفسحة بس دا بردو ميمنعش اني اكتب أنا بردو عنها بطريقتي وأوصف شعوري
كمان بعتبر المدونة دفتر مذكراتي فمش معقول يعني اضيع احلى ذكرياتي من غير ما اكتبها...

المهم بقى أنا صورت صور للفسحة عشان تحسوا انتوا كمان انكوا اتفسحتوا معانا ..
ليلة ما كتبت بوست مخنوقة أوي قلت هقفل عشان أنام بس معرفتش أنام لحد الفجر صليت ونمت للساعة 11ونص وبابا خرب الدنيا

المهم صحينا وجهزنا وإيمان جت عشان ننطلق بقى يااااه على السعادة اللي كنت فيها من زمان نفسي أنا وشوشو وإيمان نسافر سوا

وأخيرا اتحقق حلمنا...

واحنا في طريقنا" للقريات" دي البلد اللي احنا رايحين لها.. في قصر في الطريق اسمه قصر "كــــاف" أنا زرته قبل كدا بس احنا كان معانا عيلتين اصحابنا وكانوا هما كمان عايزين يروحوا المهم يعني فرصة عشان إيمان كمان تشوفه

ودي شوية صور للقصر

دا القصر أو القلعة من برة



دي البوابة اللي دخلنا منها (البوابه من جوه)

دا الباب بقى اللي يدخل على القلعة نفسها من جوه الكتاب دا يقابلك تقرأ فيه الحكاية بتاعة القلعة دي

الصخرة دي بردو موجودة عليها رسمات وفي ناس راسمين عليها راجل راكب حصان ههههههههه ياخسارة مش باين بقى بس شكله يدحك "اللي راسمين من الزوار"

دي صورة ملك أو أمير مش عارفه والله

دا بقى السجن شكله يخوف من جوه أنا صورته بس مكنش باين عشان ضلمه

شايفين أخويا راسه وألف جزمه انه يغلس عليا ويكون في الصورة دي اعمله ايه هو حر بقى

المكان دا فيه أربع غرف لكل زوجاته كان متجوز أربعهدي غرفة منهم من جوه

ودا صندوق من اللي كانوا بسشيلوه فيه حاجاتهم قديم أوي وحالته حاله

~~~~~~~~~~~~~~~~

بعد كدا كملنا طريقنا ووصلنا القريات ورحنا مطعم جميل وطلبت اتغدى بروست (كنتاكي يعني) وصورتلكوا الوجبه بس كان لذيذ جدا

وأنا كنت جعانة أوي لإني مفطرتش والساعة كانت 2الظهر كدا

~~~~

بس بعد كدا روحنا الملاهي هي مش ملاهي كبيرة يعني ملاهي على قد حالها

أنا قعدت اتحايل على شيماء وإيمان عشان يقوموا ومحدش قام

ايمان مصدعه وتعبانه وبتقولي بطلي شغل عيال وشيماء قاعدة على اللاب توب

أنا اتقهرت وقلت والله لوريكو أخدت التذاكر اللي بابا جايبهالنا احنا البنات وقلتلهم هلعب نونه"دي نهلة أختي الصغننة عندها خمس سنين"

ولعبت عربيات وأنا بقى ايه سواقه كدا محدش يغلبني بس الراجل ابن الذين خلاني اركب عربية كانت مجربعة ومنيلة خالص

المهم جت إيمان اديتني تذاكر تاني عشان اعترضت على عدد التذاكر فبابا اشترالي تاني واخدتهم ولعبت دور تاني في العربيات وإيمان بتتفرج عليا

بعد كدا ركبت الساقية أنا والبنات الصغنين اللي معانا(بترعب منها جدا مبحبش الأماكن العالية بدوخ) بس اهو عناد بقى فيهم

وبعد كدا لعبت مع البنات لعبة كهربا يعني زي استغماية كدا بس مش بنستخبى لو اللي بيجري ورانا قرب مننا نقول كهربا عشان ميمسكناش

تقريبا تعرفوها

والستات هيموتوا عليا من الدحك بس أنا طنشت أنا عايزة أعيش طفولتي هههههههههههههههه

بعد كدا بقى بنت صغننة اسمها "أيتن" اقترحت عليا نركب السفينة اللي بتتمرجح جامد أوي وتطير في الهوا

أنا طبعا جربتها قبل كدا في جيرو لاند في مصر وقلت مش هركبها تاني

بس اعمل ايه فضل معايا تذاكر وعايزة استمتع بيهم بقى فدست على قلبي وركبت وقلنا للراجل يخففها بس العيال اللي راكبين فضلوا يغنوا ويقولوا

سرع سرع سرع

كنت عايزة الطشهم بس مافي اليد حيلة

وركبتها كمان مرة

وكمان مرة بس دي كانت مع ايمان وشيماء واقول لشيماء شدي علينا الحديدة عشان منوقعش لإنها سايبة تروح الهبله تصوت وتزيحها لبرة

بس أنا دلوقتي بمشي بعرج عشان من كتر الخوف كنت بضغط برجلي على الكرسي اللي قدامي

3 مرات ركبتها فأكيد رجلي هتوجعني

هي ممتعة جدا مع انها تخوف أوي ومبطلتش صويت غصب عني بقى

وأخويا واصحابه هيموتوا علينا من الدحك

كنت مع الصويت بضحك بهستيريا شديدة من كتر الخوف

والست ايمان في الآخر قامت تلعب وتجري ورا البنات بعد ماكانت بتتريق عليا هههههههههههههه

~~~~

بعد مامشينا من الملاهي رحنا السوق واشتريت 3 صناديق جمال جدا

ايه رايكوا حلوين مش كدا؟؟ اكيد حلوين لانهم زوء شوشو وزوئي طبعا

~~

وكنت هشتري موبايل بس محتارة ايه رايكوا في موبايل N81 عايزة رايكوا لإني محتارة لازم تساعدوني

بعد كدا بابا اشترالنا أحلى عشا بالنسبالي ((سندويتشلت طعمية وفول ومخلل وعصير)) هههههههههههههه وبابا اشترالنا درة عشان نشويه ياسلاااااااااااااااااااام بموت في الدرة المشوي بعشقه

من ساعة ما جينا من مصر مدقتهوش لإنه مش بيتباع عندنا واللي بيتباع مش حلو

~~~~~~

وشكرا شكرا شكرا لكل اللي علقوا البوست اللي فات وواسوني ونصحوني لإني كنت مخنوقة أوي وتعليقاتكوا فرحتني

ربنا يسعدكوا

((مرمر_ادم المصري_اسلام ديو_المعتصم_إشراقه اون لاين_ستيتة حسب الله الحمش_ smart mody_tamer nabil_GIGI_poomlllse_الظلام_بنوتة))

بس كدا خلاص كفاية رغي و ايدي وجعتني من الكتابة أنا رايحه اشوف ماما عايزة ايه

ألقاكـــــــــــم

مخنوقــة أووووي

*السلام عليكم ورحمة الله وبركاته*

~~~~~~~~~~~~~~~~

ازيكوا ياجماعة يارب تكونوا بخير

والله دي فضفضة لا أكتر ولا أقل مش عارفة مالي مخنوقة أوي أوي أوي قلت احكي هنا شوية

المفروض إني انزل بوست دلوقتي بس ماما لقيتني صاحية قالتلي قومي نامي عشان تقدري تصحي تصلي الفجر

وعشان هنسافر بكرة لازم تكوني فايقة ومتغلبنيش بالصداع بتاعك.

أصل أنا بتعب في السفر مع إننا بنسافر كتير أوي

يعني المفروض متعودة

يلا ربنا ييسر ومصدعش بكرة احنا على العموم مسافرين بلد جنبنا بينا وبينها 150 كيلوا يعني ساعة ونص في الطريق

هنروح نتفسح شوية أصل المدرسة هانم هتبدأ يوم السبت الجاي دا

يااااااااااااااااااالهوووووووووووووووي

يارب ارحمني هخلص امتى تعبت بجد تعبت في المدرسة دي ومش مرتاحة ابدا فيها

حتى البنات في الفصل بعد ماكنا كلنا شلة وحدة بتحب بعض وتخاف على بعض اتفرقنا وخصامتنا كترت

وحدة صحبتي اسمها إيمان سعودية مش إيمان الفلسطينية أنا وهي مبنكلمش بعض بقالنا شهرين تقريبا

أنا مخنوقة بجد والله ياناس كلمتها وبعتلها بنات مع إني مغلطتش في حقها بس أنا بحترم العلاقات اللي مبنية على الحب وبخلص فيها أوي

دي مهما كانت صحبتي ومش صحبتي وبس دي كانت من انتيمي

أنا بجد مجروحة منها أوي بس خلاص معدتش اتحمل جرح لكرامتي تاني

أنا كرامتي أهم عندي من أي حاجة ومحدش يدوسها واللي يتجرأ مش بيحصله طيب

أنا مش شريرة بس كرامتي غالية أوي عليا يمكن بابا علمني الكرامة من وأنا صغيرة بس أنا عارفة اني فهمتها غلط شوية

أصلها عندي زياده عن اللزوم

....

غير كدا بقى المدرسات بقى أنا زعلانة منهم جدا جدا جدا عشان اللي عملوه معانا في الامتحانات زي ماقلتلكوا في بوست (وعدت إليكم)

والله ماطايقة حد في المدرسة بس هستحمل كفاية في بنات صحباتي هناك بيصبروني على المر دا

وأختي شوشو هانم وصحبتها فاطمه اللي دمها عسل الاتنين ينسوا الواحد الدنيا باللي فيها عليهم خفة دم

ربنا يخليهوملي

وكفاية وجود إيمان توأم روحي اللي بتصبرني رغم الألم والجرح اللي فيها وأدينا بنساعد بعض عشان نكمل في الدنيا دي ونقف على رجلنا

ونعين بعض على طاعات كتير

ربنا ميحرمناش من بعض

واسفة بقى طولت عليكوا اذا انتوا مستحملتونيش مدونتي حبيبتي استحملتني

وهتستحملني ربنا يخليكوا ليا ويخليلي حبيبتي(أيام زمان)

~~~~~~~~~~~

ملحوظه: رانيا حبيبتي وحشتيني أوي ياروني والله وحشتيني جدا عايزة أشوفك محتاجة لنصايحك كنت بجد محسساني انك اختي الكبيرة وانتي فعلا كدا

عايزة نقعد مع بعض زي زمان

عارفة انك بتابعي المدونة ومش بتعرفي تعلقي ياعبيطة بس والله انتي معايا دايما ومستنية اليوم اللي نتجمع فيه سوا

يارب جيبه بسرعه اليوم دا

~~~~~~~~~~~~~

شكرا لكل اللي قدر يكمل لآخر البوست بجد بشكره من قلبي

ربنا يسعدكوا يارب

~~~~

ألقـاكــــــــــــــم

وعــــدت إليكم..

أكيد أكيد وحشتكوا ووحشتكوا أوي كمان عارفه والله بس أديني جيت نورت البيت (مدونتي) وهنور مدوناتكم إن شاء الله بتعليقاتي العسولة

هههههههه...

يااااااااااااه مريت بأصعب إسبوعين والله اتهلكت في المذاكرة وتعبت جداً مكنتش بنام الاّ ساعات معدودة على العصريه كدا وأقوم المغرب وأبدأ موال المذاكرة لحد تاني يوم بس الحمد لله عدوا على خير مع إن والله المدرسات عملوا فينا مقلب محترم... حددولنا حاجات معينة نذاكرها.. وفي الإمتحان نمسك الورقه نلاقي أسئلــة برة التحديد اللي معانا وعمرنا ما شفناها غير دلوقتــي..

أحكيلوا موقفين حصلوا معايا خلال الفترة دي:

أول يوم كان عندي امتحان بلاغة وعلم الفرائض والمواريث ذاكرتهم كويس جدا وكنت مبسوطه وواثقة من نفسي وراجعت البلاغة قبل الإمتحان وقلت هراجع الفرائض في فترة الإستراحه بين اللجنتين ولما رحت المدرسة لقيت البنات بيراجعوا فرائض واتصدمتا لما عرفت ان اللجنة الأولى فرائض مش بلاغه حسيت إن كل أفكاري اتشتت وفضلت أعيط والبنات يهدوا فيا ولما بدأ الإمتحان الحمد لله ربنا يسرهالي وحليت وجبت فيه 29ونص من 30 ..

الموقف التاني: كان عندي امتحان جغرافيا والأبلة طبعاً محددلنا زي ما قلتلكم وبدأت أحل لقيت كله ماشي معايا في الآخر بقى لقيت سؤالين ولا عمري شفتهم في حياتي طبعا بسبب الإعتماد على التحديد وردة فعلي كانت العياط لمدة ساعة ونص بالزبط كدا والله زي ما بقولكوا ودماغي بقى كانت هتنفجر من الصداع زيادة على العياط السهر .. الأبلتين المراقبين حنوا على حالي وصعبت عليهم وحاولوا يهدوني بس أنا صعبانة عليا نفسي وتعبي اللي حسيت ان ملهوش أي قيمة فنادوا الأبلة بتاعة الجغرافيا وجت ساعدتني ولما جيت أطلع بعد الإمتحان دخت وكنت هقع لولا البنات سندوني ومشوني بس الحمد لله جبت فيها 30 من 30 ..

دي مواقف حصلت معايا من ضمن مواقف تاني وانهردة أخدت النتيجة كنت عايزة أصورها وأوريهالكوا بس بلاش فضايح بقى

على العموم

ترتيبي الأول بتقدير ممتاز والنسبة اللي تكسف 96.47% نسبة تكسف صحيح حاجة تزعل وعيطت على تعب الليالي اللي ضاع هباءً منثورا

بس الحمد لله على كل حال دا قدر بنا ولازم أرضى بيه

ربنا ييسرلي الترم تاني وأجيب أحسن من كدا

وأخيراً بقول (( وآدي جزاة اللي يذاكر من التحديد))

ملحوظه:بشكر كل اللي هنوني في يوم ميلادي واتبسطت بدعواتكم الجميلة جدا ربنا يسعدكم ومعلش إعذروني إتأخرت عليكم بسبب إمتحاناتي

وسوري طولت عليكم يارب مكونش أزعجتكم

ألقاكـــــــــــــــــــــــم