BLOGGER TEMPLATES AND TWITTER BACKGROUNDS »

بوسي

6/23/2009

والتهمــــني القمـــر


والتهمنـــــي القمــــر


بداية بشكر كل واحد علق عندي وسأل عني واهتم بيا
بجد بجد انا بحبكوا اوي اوي
وبفرح اوي لما بلاقيكوا بتيجوا تسألوا عني حتى ولو مكنتش منزلة بوست جديد
ربنا يسعدكوا يارب
ــــــــــــــــــــــــــــــــــــــ
"والتهمنــــــــــــي القمــر"

أخبرتني عجوز تبدو عليها سمات الشــر بأن القمــر أصبح وحش الزمــان , وأنه يلتهم النــاس

في كل مكان , لــم أصدق كلام العجــوز ولكن القمر ظهـر وبان , وفي فمــه الخالي من الأسنان ..
أمــام عيني ألقــى فيه إنســان ...
ارتعشت خوفــا وأحسست وقتهــا بفقد الأمـــان ...
" وخير اللهم اجعله خير"

دا الحلم اللي حلمته انهرده بصراحة مش عارفه أنا كنت من ضمن اللي القمر الجعان أكلهم ولا لأ...
ههههههههههههههههههههههه
رغم إني صحيت مخضوضة إلاّ إن الحلم يوقع من الدحك
دا حتى في الكارتون مفيش حاجة زي كدا مش عارفة الأحلام العجيبة دي بتيجي منين...
بس والله فعلا دا الحـــلم..
ـــــــــــــــــــــــ
طبعا دا بوست كدا عن أحوال الطقس بتاعتي الفترة دي نفسيتي تعبانة جدا جدا جدا
توتـر ـ خــوفـ ـ ألـــم ـ حـــزن ـ تشــتت ـ حطــــام
حاجات كتير بتحصل حواليــا مأثــرة عليا ومدمراني تدمير شــامل بمعنى الكلمه..
سبحان الله الواحد بيكون قاعد في أمان الله وتجيله المصيبة ..
بس دا قدر وامتحان من ربنا والواحد لازم يرضى وينجح في الصبر على أي بلاء..
أنا مش عارفة هيحصل ايه بعد الإمتحانات ما تخلص


أولا عندي امتحان قدرات ودا بيقيسوا فيه قدرات الطالب ويكملوا بنتيجته نتيجة الثانوية


غير كدا لازم ننقل من بيتنا عشان مالك البيت زود الإيجار لمبلغ عالي جدا البيت ميستحقهوش


يوم الأربع من الإسبوع الجاي آخر يوم أشوف فيه صديقات عمري اللي درست معاهم 12 سنة كاملين


ياترى اليوم دا هيحصلي في ايه؟؟


ياترى هذاكر عشان امتحان القدرات ازاي وهحله ازاي

ياترى هننقل من البيت ازاي .. البيت اللي بعشقه بجد

البيت اللي ربنا حققلي فيه حلم كان من أحلى وأهم أحلامي

" أوضتي البمبيه" اللي بعشقها ازاي همشي واسيبها كدا بكل سهولة؟؟..

السطح حبيبي اللي لما بحس بالخنقه بطلع وحدي

واقعد فيه لحد بليل واحس بالراحه فيه لما بناجي ربنا

كل مكان في البيت ليه ذكرى مميزة معايا

ازاي هقدر اسيبه ازاي

ياترى ايه الجامعه اللي هدخلها ؟؟

ولا مش هدخل جامعه ؟؟

ولا هيحصل ايه ومستقبلي هيكون شكله ايه؟؟

ياترى هموت قبل دا كله ؟؟؟؟
والله شكلي لا يسر عدو ولا حبيب
شبه ميته بجد
عمي لما شافني قال لإخواتي انتوا طلعتوها من القبر تاني ليه دي
رجعوها رجعوها
ههههههههههههههه
والله ياعمو انت ظريف
ــــــــــــــــــ
......
مفيش غير اني أقول

آآآآآآآآآآآآآآآآآآآآآآآه ياربي آه

ارحمني وخفف عني وحل كل مشاكلي وساعدني أخلص امتحاناتي على خير
واجيب نسبه ارفع بيها راسي قدام الكل
وافرح بيها كل اللي بيحبوني ومهتمين بيا..
ارجوك يارب اشفيني ويسر لي كل عسير وخليك معايا في كل خطوة
أنا محتجالك أوي ياربي
مش هشكي لحد غيرك تاني
ولو شكيت على سبيل الفضفضة
هشكي لقلمي الناس كل واحد مشغول بمشاكله
وهمومه ومحدش فاضي لحد
عشان لو شلت جوايا ممكن انفجر..
لكن مع كل دا أنا مش هعترض على أقدارك أبدا
أنا مؤمنة بيك ومش هفقد الأمل
اغفرلي يارب لو كنت في يوم اعترضت .. سامحني وارحمني برحمتك
أنا عبدتك الضعيفة الذليلة...
ــــــــــــــــــــــــــــــــــ
يوم السبت اللي فات كان احساسي ان كل دموع الدنيا ولا حاجة قدام دموعي

ياترى هو كل واحد يكون في اخر سنة مدرسه بتكون حالته كدا؟؟؟؟؟

بس على الأقل اللي في بلده في امكانية يتواصل مع اصحابه ويشوفهم

لكن أنا هشوفهم فين تاني؟؟؟

هنتلم كلنا ازاي تاني؟؟؟
هنلعب سوى ونرخم على بعض ازاي تاني؟؟؟
كل دا كوم
وفراقي لتوأمي روح قلبي كوم تاني لوحده وهم لوحده
آأأأه يا موني حتى اسم مدونتك وجع قلبي ياشيخه

ياترى يا إيمان هنشوف بعض ازاي تاني ؟؟؟
عارفه اننا هنقول فينك يا ايام زمان
ليت الزمن يرجع ونرجع احنا وياه
بت يا موني^_*

انتي رايحه فلسطين .. خدييني معاكي بأه بالمره وشليني في الشنطه
ومحدش هياخد باله ونريح نفسنا من الغم دا
هههههههههههههه
.......
آآآآآه
يـــــــــــــاترى ايه اللي مكتوب ومقدر عليا
كل اللي بتمناه انه يكون خير
.....
ادعولي ياجماعه دعاء المسلم لأخيه المسلم في الغيب مستجاب..
ــــــ
طبعا عن أخبار امتحاناتي
فالحمد لله حليت حلو أوي في
البلاغة والقراءات لللأئمه السبعه والنحو والصرف والإنجلش والفقه والحاسب الآلي

وبكره عندي امتحان تاريخ آل سعود
بما إني في السعودية فبدرس التاريخ بتاعهم وصعب جدا جدا
وربنا يعين واحل بكره
وسوري اني طولت عليكوا
بس مدونتي بأه وبفضفض فيها ولا ممنوع (وش معصب)
ههههههههههههههه

ألقـــــاكم أحبتي في اللــــــــــــــــــه
تحيـــ بســومــة ــاتي(:

28 التعليقات:

ايمان روحي يقول...

يخرب عقلك ياشيخ
بجد بسمه انا مش قادرة اتحمل
وانتي جايه تزيده
حررااااااااااااااااام عليكي
بجد حرام
كل محاول انسي بتفكريني تاني
بدك فلسطين
انشاء الله بتروحيلها محررة ومنصورة
وبتزوريني ببيتي
وبنروح سوي حي الامل
هههههههههههههههه
بس بسمه
انتي عارفه انك ارحم مني
انا هطلع من السعوديه مش هرجع تاني
الا لو حصلت معجزة
بسمه انا اليوم فكرت بيوم الاربعاء
وضليت نايمه
مشان هيك لم اتصلتي كنت نايمه
مابدي قوم
مش عارفه شو احكي بس
بجد
مخنوووووووووووووووقه
والقدرات كمان زادت الدنيه
والتاريخ اللي مش راددي يخلص
طلع روحي
واللي عملتوا مقبوله امبارح معي
وارسلتلي المسج طلع روحي
طول امبارح ببكي
مشان الله
خلاااااااااص
فراق تاني لا سيبيه
علي الله
منا حكيت
ليت الزمن يرجع وارجع انا وياه
كيف كانت فرحتي زمان بدخولي فلسطين
واتحديت الكل
وكيف هسه؟؟؟؟؟
ماحد بضل عحالو
والقمر فعلا
يمكن سار اللو مخال
مش بس اسنان
ههههههههههه
بس مهم بعمل بضل قمر
عندي كلام كتير لو بدي احكيه
هموت
خليني ساكته احسن
مشان لو هموت
اموت بسكون وبين اسوار قلبي
تحيـــاتتي

بـسـمـــة صـــــلاح يقول...

مفيش حاجه اقولها ياموني غير
الآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه ه ه

بحبك ياغاليه
نورتيني بتعليقك الأول
اتنيلي زاكري يلا
هع هع هع
عندنا بكره تاريخ وربنا يستر

ديالا يقول...

انا مريت بالمرحله دي بعد الثانويه العامه

وزعلت كتير اني هسيب اصحابي وكده

بس كل مرحله ليها طعم مختلف وشكل مختلف

يعني بكره تلاقي اصحاب تانين وبرضه هتحبيهم وبرضه هتزعلي عليهم لما تخلصي جامعتك

وعلي فكره اجمل مرحله مرحله الثانوي

وربنا يوفقك يارب

وسلملي علي القمر المفترس ده كتير

mohamed ghalia يقول...

بالتوفيق فى الإمتحان وربنا يعينك دايما
انتى محوشه كل الكلام جواكى بقالك كتير ولا ايه هههههههههههههه

marmar يقول...

اجمل بسومه في الدنيا ازيك يا حبيبه قلبي
بصي نصيحه من اخت ليكي بس تعملي بيها عشان انا مش عارفه اكلمك عل ميل خااااااااااااااااااااالص
سيبي كل حاجه على ربنا يا حبيبتي ومش تفكري في حاجه وفكري في مستقبلك بالناحيه الايجابيه وقولي اااه هدخل كليه كذا وهبقى كذا كمان اربع خمس سنين وهرجع انا وايمان نتكلم ونتشاقى تاني ونرجع حبايب تاني
كل حاجه وحشه متفكريش فيها وسيبيها على ربنا هو الوحيد اللي يقدر يساعدك ويشيل الحزن عن قلبك

امتحان قدرات ايه بقى انا مكنش في حاجه عندي زي كده خالص ..!!
ذاكري كويس يا شطووووره وفرحينا كلنا بالنتيجه وارفعي راس مصر يا اجمل بوووسي
وحششششششششششششششتيني اوووووووووي
مسافره مصصصصصصصصصر امتي يا سكر

MaNoOoSh يقول...

ان شاء الله ربنا يكتبلك كل خير
متقلقيش كده
هو اللي بعز على النفس فعلا هو فراق الاصدقاء
بس ان شاء الله يبقى تواصل بطرق تانية غير اللقاء

ربنا معاكي يا قمر ويكتبلك كل خير

سقراط مصر يقول...

عندما لا تجلس او تطالع احبتك ومن تربوا معك وشبوا وكبروا معك

فحتما ستشعر بالوحده
واي وحده تلك التى تشعر بها وانت بين الناس ولكنهم ليسوا كالاحبه

فراق الاحبه شئ صعب
ادعو الله ان ييسر عليكي

وان يوفقك في دراستك
وان يرجعكي سالمه ان شاء الله
من السعودية

تقبلي مروري

ghorBty يقول...

بسمه

ربنا يوفقك يارب ويصلح لك الاحوال

لا تفكري كثيرا فالتفكير في المستقبل دائما يفقدنا الشعور بالواقع ..

وان شاء الله تقدير الله عز وجل كله خير ( وانا عند حسن ظن عبدي بي فليظن ما يشاء )

ربنا يحقق كل امانيك ويبارك فيك ويقدر لك كل خير

سلمي علي اختك كتير وربنا يفرحنا بكم ان شاء الله ..

وردة يقول...

ايه يا بنتي ده
بالراااااااااااااااحة شوية علي نفسك
والله كل شئ حيعدي زي ما انتي عاوزة ويمكن احسن
وبعد شوية حتضحكي علي كل اللي بيحصل
ده مش كلام والله ده عن تجارب
انتبهي انتي وموني وشوشو لامتحانتكم بس
وان شاء الله ربنا حيفرج همك وكربكم وحتفضلو اصحاب طول العمر
ربنا معاكي دايما
وبالتوفيق ان شاء الله
سلام

وحي القلم يقول...

السلام عليكم

على فكرة أحلامنا بتعبر عن اللي جوانا

ربنا معاكي ف الامتحانات

تقبلي مروري

(Joudy) يقول...

حلو جدا هتجننونى هو أنا ناقصة أنا متنكد عليا لوحدى عايزة ايه محتاجة حد يعيط معاكى وماله أعيط أصلى خلاص الزحمة بتاعة المسشاكل زى اللى بتجرى ورانا ولا يمكن احنا بقينى زى المغناطيس بنجذبها لينا هم ونكد فى كل مكان أهون عليكى ولا تهونى انتى عليا ولا نعيط احنا الاتنين والله مش عارفة أقولك ما تشغليش بالك بالحاجات دى لو قتى ومستعجليش النكد جاى يعنى جاى أحب أطمنك يعنى

والله يا بسومة كل المواضيع دى لها حلول الذكرى الحلوة بتعيش وأكيد هتلاقى أكتر من طريقة تكلمى بها أصحابك واوعى تفتكرى ان حاجة زى دى ممكن تبعدكوا عن بعض بالعكس انتى فى ايدك تفضلوا مع بعض

ركزوا فى الامتحانات انتى وايمى وربنا يوفقكوا ويفرج كربك وكروب المسلمين جميعا بإذن الله

ربنا معاكى
دمتى بكل الحب والسعادة والأمل

احساس طفلة محبة للرومانسية بس واقعية يقول...

بسومة

اخبارك اية ؟ يارب تكونى بخير
كويس ان الامتحانات ماشية كويس وان شاء الله تخلصيها كلها وتحلى فيها كويس

الحلم جميل يا بنتى ماله دا زى الفل لو قارنتية بأحلامى :)
بس يمكن يكون من المود السئ اللى انتى فية ولا حاجة وان شاء الله فترة وتعدى

صاحبتك هتفضل معاكى فى قلبك فى طرق تواصل كتير بنكم هتتكلموا وتشوفوا بعض وتحكوا
اى نعم هتكونوا بعيد بس هتفتكروا ايام زمان بذكرى وبسمة :)

ربنا يوفقك يا قمر
وتستقر كل احوالك للافضل
تقبلى مرورى

لجين أبو الدهب يقول...

بسومة حبيبتى

هونى عليكى ياجميل ..
معلش هو ابتلاءات من ربنا
ونصيحة بجد من واحدة مجربة
مش تتعلقى باى شئ فى الغربة لان الغربة نظامها كده اى شئ ممكن يضيع منك فى غمضة عين

وبالنسبة لدراستك كلنا بكينا ونفسيتنا تعبت وما كنش متخيلين ازاى هانعيش من غير بعض

ومرت السنين وجت الكلية وقضينا فيها احلى ايام وقعدنا نقول لالالا دى اصعب من ثانوى بكتير وبكينا برده وتعبنا

ودلوقتى كل واحد بيبتسم ويفتكر ذكرياته ومش بيمتلك غير الدعاء لناس ارتبط بيهم لفترة

هو ده حال الدنيا ياحبيبتى

احبب من شئت فانك مفارقه

ادعى ربنا يجمعك معاهم فى الاخرة

انا والله قلبى وجعنى من البوست بتاعك لانى حاسة بيكى اوى وعشت الحاجات دى قبل كده بجد

انتى بس علشان رقيقة وعسولة حاسة بكده

ربنا يجمعك مع كل احبابك دائما وابدا ..

شيماء جمال(شيمو القمر) يقول...

مشاعر طبيعية يا حبيبة قلبى

أنا كنت عامله زيك كده وأكتر
لان كليتى كانت فى القاهرة وانا من اسكندرية وروحت بلد جديد وجامعة جديدة وأول ما وصلت كلمت صحبى قفى التليقفون واعدت ابكى ورجعت وما كنتش عايزة اروحها تانى
بس صاحبت ناس
جديدة وعشت حياتى ومش متخيلة حياتى دلوقتى من غيرهم وشفت حاجات واتعلمت حاجات فادتنى جدا

لو خيرتم اقداركم لاخترتم الواقع
سيبيها على ربنا


ربنا يوفقك فى الامتحانات ومصر مستنياكى

تحياتى لك
شيمو القمر

طـائر الليــل الحـزين يقول...

القمر مش يزعل
كلنا مرينا على الفترة دى
اننا ننتقل من مرحلة دراسية لغيرها
وبتحسى بأيه
اصحابك والمكان وكل حاجة اتعودى عليها لسنين طويلة
بس صدقينى هتحسى بعدين بأختلاف كبير ان شاء الله هيعجبك
ومش تزعلى
وبالنسبة للبيت
التغيير برده مطلوب
وان شاء الله تستريحى فى المكان الجديد كمان
تحياااااااااااتى يا قمر
وربنا يطمنا عليكى

المعتصم يقول...

ايه يابنتى الاحلام الغريبه دى
دى كلها هلاوس من الامتحانات بس
ماتقلقيش هى فترة وهتعدى ع العموم
بحلوها ومرها
ومع الايام هتقدرى تتأقلمى مع الوضع الجديد وهتبقى ذكريات سعيده
المهم شدى حيلك وركزى كده فى المذاكرة
وقوليلى عملتى ايه فى الامتحان بتاع التاريخ ؟؟؟
وربنا يستر فى القدرات وباقى الامتحانات
......
ربنا يكرمك وينجحك يابسمه يارب
ويحققلك كل اللى نفسك فيه
وتجيبى مجموع كبييييييييييير قااااااااااد كده
وتدخلى الكليه اللى بتتمنيها
اللهم امين
كفايه عليكى كده وروحى ذاكرى
وابقى سلميلى على البت شوشو هانم
ســـــــــــــــــلام

ادم المصرى يقول...

بسمه يا انتى رقيقه جدا
بجد فعلا انا قسيت جدا من الموضوع ده

وبزات فى حياتى كلها يعنى مثلا

انا قعت حياتى لحد 12 سنه من عمرى كنت فى ايطاليا ورجعت مصر

وكملت حياتى فيها تخيلى بقه ان كان لزم انى اعرف ناس من الاول وجديد وده اصعب شيئ صحاب جران حياه كمله جديده كان شيئ صعب جدا ممقدرش انساه لحد الان

بـسـمـــة صـــــلاح يقول...

....

yoyo يقول...

صباحك سكر يا بسومة

يا حبيبتى ربنا ان شاء الله مش هيضيع تعبك ابدا
وان شاء الله الامتحانات تعدى على الف خير
رفم فراق الاصدقاء بيبقى فى القلب حبهم مهما طال البعاد ومر الزمن

ربنا يوفقك يارب
شدى حيلك بقى
دمتى اختى بالف خير
تحياتى
يويو

امـنــيــتــي يقول...

انا شايفك مغمقاها اوي

اكيد ما بعد الضيق الا الفرج يابسومه

انشاء الله رح ارعيلك بعد ما افطر وانا حاسس ان ربنا حيتقبل مني ويفك الهم ولحزن الي بتمرو بيه

بزنس تعيش يقول...

انتى امتلكت مفتاح جميع
مشاكلك يا بسمة
حينما الهمت الدعاء
نسأل الله لك سرعة الاستجابة
وبالتوفيق فى الامتحانات
وفى النتيجة
وكى لا يعتصرك الامل انصحك بان تعرفى ان الدنيا ثلاث ايام
الامس قد ولى ولا فائدة من البكاء عليه
الغد ولم ياتى بعد ولا نضمن ان ياتى
وايوم وهو ما بايدينا وعلينا الاستفادة منه بقد ما نستطيع
----------------------------------

مع تحياتى / حازم ربيع

فارس بلا جواد يقول...

ازيك يابسمه ايه اخبارك انا اسف بجد بقالى كتير مسالتش عليكى انا منتظر تعليقاتى

Hossam يقول...

Hello
انا سعيد جدا بمعرفة مدونتك
واضح ان انا وانتى فى نفس السن
بجد اتمنى ن يكون ربنا وفقك فى الامتحنات انا خلصت من يوم 6-6 بس مستنى الثانوى العام يخلص عشان اعرف هخش كلية ايه
اتمنى منك التخلص من الحالات البشعة التى تمرى بها وانشالله خير
اتمنى لكى التفوق
سلام

الست فرويد يقول...

بسمة الجميلة

انا جاية اسلم عليكى :)

ربنا بوفقك ويسهل الامتحانات عليكى

ويريح بالك ويسعد ايامك يارب :)))))

ارق تحياتى لكى
وخالص مودتى

elsha3er يقول...

السلام عليكم ان شاء الله ربنا يكرمك فى حياتك الجاية

بس انا عايز اعرف كنتى بترسمى رسومات تجنن فين هى


تحياتى


احمد الشاعر

إشراقة أون لاين يقول...

لى عودة للتعليق ننتظركم فى عيد ميلاد إشراقة غدا

fL0weR-giRL يقول...

السلام عليكم
***********\
بسومه فينك ياعسل وحشتينا والله
ايه يابنتي طمنينا عليكي مالك نستينا ولا ايه
...............

Unknown يقول...

ازيك يا بسمة اخبارك ايه؟؟
يارب تكونى كويسة