وعــــدت إليكم..

أكيد أكيد وحشتكوا ووحشتكوا أوي كمان عارفه والله بس أديني جيت نورت البيت (مدونتي) وهنور مدوناتكم إن شاء الله بتعليقاتي العسولة

هههههههه...

يااااااااااااه مريت بأصعب إسبوعين والله اتهلكت في المذاكرة وتعبت جداً مكنتش بنام الاّ ساعات معدودة على العصريه كدا وأقوم المغرب وأبدأ موال المذاكرة لحد تاني يوم بس الحمد لله عدوا على خير مع إن والله المدرسات عملوا فينا مقلب محترم... حددولنا حاجات معينة نذاكرها.. وفي الإمتحان نمسك الورقه نلاقي أسئلــة برة التحديد اللي معانا وعمرنا ما شفناها غير دلوقتــي..

أحكيلوا موقفين حصلوا معايا خلال الفترة دي:

أول يوم كان عندي امتحان بلاغة وعلم الفرائض والمواريث ذاكرتهم كويس جدا وكنت مبسوطه وواثقة من نفسي وراجعت البلاغة قبل الإمتحان وقلت هراجع الفرائض في فترة الإستراحه بين اللجنتين ولما رحت المدرسة لقيت البنات بيراجعوا فرائض واتصدمتا لما عرفت ان اللجنة الأولى فرائض مش بلاغه حسيت إن كل أفكاري اتشتت وفضلت أعيط والبنات يهدوا فيا ولما بدأ الإمتحان الحمد لله ربنا يسرهالي وحليت وجبت فيه 29ونص من 30 ..

الموقف التاني: كان عندي امتحان جغرافيا والأبلة طبعاً محددلنا زي ما قلتلكم وبدأت أحل لقيت كله ماشي معايا في الآخر بقى لقيت سؤالين ولا عمري شفتهم في حياتي طبعا بسبب الإعتماد على التحديد وردة فعلي كانت العياط لمدة ساعة ونص بالزبط كدا والله زي ما بقولكوا ودماغي بقى كانت هتنفجر من الصداع زيادة على العياط السهر .. الأبلتين المراقبين حنوا على حالي وصعبت عليهم وحاولوا يهدوني بس أنا صعبانة عليا نفسي وتعبي اللي حسيت ان ملهوش أي قيمة فنادوا الأبلة بتاعة الجغرافيا وجت ساعدتني ولما جيت أطلع بعد الإمتحان دخت وكنت هقع لولا البنات سندوني ومشوني بس الحمد لله جبت فيها 30 من 30 ..

دي مواقف حصلت معايا من ضمن مواقف تاني وانهردة أخدت النتيجة كنت عايزة أصورها وأوريهالكوا بس بلاش فضايح بقى

على العموم

ترتيبي الأول بتقدير ممتاز والنسبة اللي تكسف 96.47% نسبة تكسف صحيح حاجة تزعل وعيطت على تعب الليالي اللي ضاع هباءً منثورا

بس الحمد لله على كل حال دا قدر بنا ولازم أرضى بيه

ربنا ييسرلي الترم تاني وأجيب أحسن من كدا

وأخيراً بقول (( وآدي جزاة اللي يذاكر من التحديد))

ملحوظه:بشكر كل اللي هنوني في يوم ميلادي واتبسطت بدعواتكم الجميلة جدا ربنا يسعدكم ومعلش إعذروني إتأخرت عليكم بسبب إمتحاناتي

وسوري طولت عليكم يارب مكونش أزعجتكم

ألقاكـــــــــــــــــــــــم