أحبكم في اللــــــه

والنبي

وحياتك

والنعمة

وحياة أغلى حاجة عندك

وديني

والكعبة

وغلاوتك.....الخ

ناس كتير مننا بتتفنن في الحلفان ومش أخدين بالهم إن الحلف ليه ضوابط يعني المفروض منكترش من الحلف لإن ربنا سبحانه وتعالى قال:((ولاتطع كل حلاف مهين)) سورة القلم.

مش عمال على بطال نقول (واللـــه_وربنا_قسما بالله)

فما بالكوا بقى باللي بيحلف كتير وهو واقع في الشرك..

ياجماعة عَنْ أَبِي هُرَيْرَةَ رضي الله عنه أَنَّهُ سَمِعَ رَسُولَ اَللَّهِ صلى الله عليه وسلم يَقُولُ:(( إِنَّ اَلرَّجُلَ لَيَتَكَلَّمُ بِالْكَلِمَةِ، لَا يُلْقِي لَهَا بَالاً، يَهْوِي بِهَا فِي اَلنَّارِ، أَبَعْدَ مَا بَيْنَ اَلْمَشْرِقِ وَالْمَغْرِبِ ))

يعني الحلف بغير الله اللي منتشر قوي بينا وبكثرة دا شرك أصغر والشرك دا مش معناه أنه أصغر يبقى نتساهل بيه دا هو بالذات اللي ناخد بالنا منه لإن هو الطريق اللي بيوصلنا للشرك الأكبر اللي هو سبب في الخروج من الملة وصاحبه مخلد في النار إذا مات من غير مايتوب من الشرك الأكبر ..

عشان كدا ياجماعة لازم ناخد بالنا من كلامنا أنا بقولكوا كدا لإني بحبكوا في الله وبخاف عليكوا

ومحدش يخلي الشيطان يلعب في راسه ويقعد يوسوس ويقول لنفسه أنا مقدرش أسيب الحلف دا أنا متعود وأنا مش قصدي بيه إنه يكون شرك أنا نيتي صافيه إنما الأعمال بالنيات... لا لا طلعوا وساويس الشيطان دي من راسكوا وخافوا على نفسكوا..

قال ابن عمرو رضي الله عنهما لا يُحلف بغير الله فإني سمعت رسول الله صلى الله عليه وسلم يقول:(من حلف بغير الله فقد كفر أو أشرك)

وكمان حاجات كتير بنقولها فيها شرك من غير ما ناخد بالنا

زي اللي يقول: عمايل إيديا وحياة عينيا_ممكن تستبدلوا حياة عنيا دي بأي كلمة تاني

كمان اللي بيقولوا:لولا ربنا وفلان _دا من بركات ربنا وبركاتك .. فإنت كدا بتساوي العبد بربنا بسبب الواو دي ممكن تقول لولا ربنا ثم فلان

لإن ثم معناها التريب والتراخي بتخلي العبد تابع لربنا مش معاه وبيساويه

غير الشرك بقى في كلام تاني زي مثلا الواحد لما تحصله مشكله يقول :يارب أنا ليه بيحصلي كدا

أو لما حد يسمع إن في حد حصلتله مصيبه يقول: حرام والله ميستاهلش دا كويس هو عمل ايه عشان يجراله كدا

والكلام دا فيه اعتراض على قضاء الله وقدره الواجب علينا الصبر ولو حصلت مشكله نقول : إنا لله وإنا إليه راجعون..اللهم أجرني في مصيبتي واخلفني خيرا منها..

وكتير كلام بنقوله ياريت ياجماعة ننتبه لنفسنا وللسانا

وياريت الكلام والنصيحة دي متوقفش عندك لأ انصح قرايبك واصحابك وكل الناس اللي بتحبهم لو بتخاف عليهم وعايزلهم الخير وربنا يأجركم إن شاء الله

وآسفة على الإطالة

اللهم اغفر للمسلمين والمسلمات والمؤمنين والمؤمنات الأحياء منهم والأموات

~~~~~~~~~~~~~

ألقاكـــــــــــــــــــم