..~** لا تتوج إلا الأميــــرات**~..

وأنــــــــــــــــــا برنسيسة

التاج دا أمره عجييييييييب 3 عساسيل أهدوهولي أولهم العثولة "طفلة محبة للرومانسية بس واقعية"

وتانيهم اللي هي في الأصل طفلة اهدتلها التاج دا العثولة" زوجه عنيدة" وتالتهم العثولة نصي الغالي عليا"بسمـــه أنور"
منورين ياكماحه والله
ــــــــــــــــــ نبدأ بقى ـــــــــــــــــــــــــــــــــ

اسمـــــك؟

بسمــــة صلاح ..والنعــم هههههه

المشهور بيه وسط اصحابك؟

ليا أسامي كتير
ايمان بتقولي "ســــومة" من غير باء ومحمد أخويا كمان

ورانيا بتقولي " سمسم" وشيماء أختي " بسبس ناو" زوزو بتقولي" بوسي" بسمة بتقولي "يانصي او ياتوأمي ويابسمتي"

مرمر بتقولي "ذئبـــــة كبننـــه"

في أسامي تاني ((كتكوتة _ بسومة _ بسمتي _ ماما بتقولي بُبـــُس _بابا بيقولي ببس لأبوه أو" يا أول قلبي ماشــاف" _ بسبوسة

(بكره الاسم دا ) _ سوسو _ بسه(من غير ميم) _ بُسُــــم))

ومشهورة في المدرسة كلها باسم" بسومــة النعــومة"
شفتوا كل الأسامي دي بتتقالي من ناس كتيرة.

سنــــــك؟
17سنة وشهرين و3 أيام (أكبر منك يابسمه انور آآآآآآآآآآآ وش مطلع لسان)

اســــم مدونتــــك؟
أيـــــــــــــام زمـــــان

مجــال دراستك؟
مكافحة في الثانوية العامة ثالث ثانوي أدبي وليا طموحات كتيرة بعد ما اخلص ان شاء الله

الصورة الرمزيه لمدونتك بتعبر عن ايه؟
انا بغير في الصورة بس بيكونوا أطفال دايما وشكلهم قمور عشان بلاقي نفسي جواهم ونفسي اكون هما ببرائتهم.

ايه ردة فعلك لو حد قل ادبه عليك في التعليق؟
الحمد لله محصلتش قبل كدا بس لو لا قدر الله وحصلت هتبع ((واعرض عن الجاهلين)) القافله تسير والكلاب تعوي وامسح التعليق
وان كان في مجال للرد هرد بطريقة مؤدبة تحرج الشخص بحيث يكون اضحوكة ومسخرة للكل.

أسوأ مدونة؟
بصراحة ممرش عليا ولا مدونة ابدا ولله الحمد.

هيحصل ايه للإيميل بتاعك بعد ما تموت؟
اولا ربنا يحسن خاتمتي وخاتمتنا جميعا
أنا مش بفتح الايميل غير عشان أرغي واتطمن على حبايبي غير كدا مبفتحش الرسايل غير كل سنة مرة
بس أكيد الايميل هيعيط عشاني ومن كتر حزنه عليا هيموت هوا كمان
ادعولنا بالرحمة واقروا الفاتحه.

اديت الباس وورد بتاعك لحد قبل كدا؟
اه الشيمــــاء أختي"شوشو هانم" عارفه باس وورداتي كلها حتى حساب المدونة كمان.

السفر بالنسبالك ايه؟
أحلى مغامرة بما اننا في السعوديه وبنسافر لمصر في الأجازة بنسافر بري وبعدين بنعدي بالعبارة في البحر وبعدين نرجع للبر تاني لحد ما نوصل بسلام
بيكون مدة السفر 3 أو 4 أيام بس بجد مغامره
بس بكره السفر لما نكون ماشيين من مصر للسعوديه ياالله على العياط بيكون ال3 أيام كلها عياط في عياط وبتعب جدا وقتها
وان شاء الله للسفر معايا بوست لوحده.

المــود بتاعك؟
والله متقلبه مليش مود معين بس الغالب النكد بسبب المذاكرة وبعض الضغوط اللي بقابلها
بس ساعات بردو بلاقي نفسي في دحك هستيري واستهبال فظيع وغلاسة افظع وحاجات كتير على حسب يومي بردو والمواقف اللي بمر بيها.

بتعمل ايه في وقت فراغك؟
اوقات فراغي والله دحكتوني فين الفراغ دا دا انا بدور عليه بالعافية هههههههههه
بس لما تحصل معجزة ويكون في وقت فراغ طبعا بقيت اراجع قراني اللي حفظته ونسيته وبحمد ربنا على النعمه دي وربنا يقدرني واتمه حفظا وتجويدا (ادعولي )
تاني حاجه بموت في الرسم وانا بسمع الأناشيد اللي بحبها ((زي بسمه مزاج بردو بت انتي متقوليش بقلدك ما انتي عارفه اننا نصين وفينا تشابه فزيع جدا جدا مش بقولك احنا توأم بس اهلنا حطونا عند زباله وكل واحده اخدتها عيله هههههههههههههههههههه))

بحب التريكو والخياطه والأعمال اليدويه بس من يوم ما عملت حبيبة قلبي مدونتي
أخده أغلب وقتي
بحب اقرا بتعجبني أوي مجلة حياة للفتيات مجلة الأسرة
واكتب أي حاجه خواطر وكدا.

الأكلــه المفضلة؟
جيتوا ع الجرح هههههههه
يمكن أكلي قليل جدا بس بحب اكل كتير غريبه مش كدا ماعلينا المهم
بحب الورق العنب ياسلاااااااااااام ولا المكرونة البشاميل بدوب فيها
والكنتاكي والبيتزا والحلويات
والشوكلااااااااااااااااااااااااااااااااااته جالكسي تحديدا
بس بقى محدش يقول مفجوعة .

الصفات التي ورثتها عن والدك ووالدتك؟
وارثه الصفات الشكلية من أهل بابا أما الصفات المعنوية من بابتي حبيبي ومامتي حبيبتي
الطيبة الزيادة أوي
وحب الصداقة والإخلاص فيها والعصبية والخجل الفظيع والعناد ورقة القلب وبابا ممكن يتأثر وعينه تدمع وماما كمان فأنا بقى عيني مش بتدمع لا دي تقول ما بتسدأ حنفية واتفتحت ههههه والهدوء بس الفترة الأخيرة بقيت شعنونة .

أكتر ست حاجات بتكرهها؟
المدرســـة_ الكدب ومايتبعه من صفات رذيلة_ لما اكون قاعدة مع ناس توسس بعضها ويبصولي ويدحكوا بكل بجاحه
الظلم_ الكبر_ الخيانة_شغل البيت_ شيء ما في نفسي. (مبقوش سته مش كدا يالهوي عليا رغايه هههه

أكتر ست حاجات بتحبها؟
ربنا ثم حبيب قلبي رسولي صلى الله عليه وسلم
ماما وبابا واخواتي وصحباتي

حلقة الذكر اللي بنعملها يوميا في البيت
مدونتي ورسماتي و (بيبرس) موبايلي
دبدوب ماما وبابا اشتروهولي زمان ومازال عندي و
عروستي "نانوسه بنام وانا حضناها ولما ازعل بشكيلها بس انا اضطريت اسيبها في مصر السنادي وااااااااااااااء مفتقداها أوي"
مدرسات ليا بحبهم أبله فريحه وأبله نصرة وأبله قيضة وأبلة حصة .عسسسسسل.

شخصيتك نوعها ايه؟
مش عارفه بس بجد سؤال صعب
انا عاطفية زيادة عن اللزوم ومترددة في قراراتي بحتاج حد اسند عليه عشان كدا بصلي استخارة في أي حاجه
كمان بيقولولي هبله ودي حاجه بتزعلني وبتأثر فيا أوي لإني مش كدا
ساعات بقول كلام يزعل بس من غير ما آخد بالي من انه يزعل والحكايه دي بتسببلي مشاكل كتير وتزعل حبايبي مني وأولهم ماما وبابا
الناس لما بتشوفني بتفتكرني متكبرة لكن لما تقرب مني وتعرفني بتتغير فكرتهم تماما
مبحبش أعتذر لحد حتى ولو غلطانه بس بعتذر بالعافيه لإني عارفه إن دا المفروض والسبب في عدم حبي لكدا بتبقى كرامتي وبابا دايما يقولي كرامتك طيب ليه بتغلطي من الأول (كبسه)
لما بزعل بشيل في قلبي واسكت يعني مش بصارح بزعلي غير لما يوصل معاايا الحد وابقى هنفجر بس لما بنام بالليل بصفي نفسي من أي زعل أو كره لحد

بس في حاجات بكرها في شخصيتي وبحاول اعدلها ربنا يقدرني ويعيني .

لماذا دخلت عالم التدوين؟
سؤال جميل... دخلت العالم دا بسبب بابا قالي عليه والحكاية دخلت راسي أوي
وكنت في الاول مش عارفه أي حاجه عنه وحطيت مواضيع ومحدش عبرني غير صحباتي
بس اتعلمت حاجات كتير جدا وعرفت حاجات عن مصر عمري ما كنت اعرفها واتعرفت على احلى واغلى الناس.

أجمل كلمه اتقالتلك في وصف مدونتك؟
بصراحه ناس كتير قالتلي كلام جميل عن مدونتي وأولهم زوزو صاحبة مدونة نور الحياة اللي هي كانت أول واحدة تعلقلي في المدونة من غير الناس معارفي.

أهمية التعليق بالنسبه ليك؟
مش هقول لكوا التعليقات بتعمل فيا ايه يااااااااااااااااه على الفرحة لما الاقي تعليق ببقى هطير بهتم اوي براي الناس وتشجيهم أو لو في نقد لصالحي بتبسط فعلا.

أحسن بوست وضعته؟ وضع اللينك....
بحب بوستاتي كلها لإني ماحطيتهاش غير لإني مقتنع بيهم

منهم

رسمـــــــــــــــــــاتي

يوم ميلاد اختي

حورية قلبي

أفضل بوست قرأتة وأفضل مدونة؟
والله قرات كتير بوستات جميلة مقدرش أحدد أفضل مدونة أنا بحب كل الناس اللي بيعلقولي وبعلقلهم ومدوناتهم مشكلة ومناسباني جدا وبستمتع وانا بتجول والف وادور بين طرقاتهم واعمل خمسات كمان ههههههه بحس بجد انها مغامرة بالنسبالي وأكيد كل واحد عارف نفسه .بحبكوا في الله والله..

الانترنت بالنسبالك ايه؟
الانترنت دا ابني حبيبي لو حصل حاجه وفصل أو اتشغلت ومقدرتش اقعد مببقاش على أعصابي خالص مالص
ياااااااااااااااااه ببقى متنرفزة أوي بحبه جدا وبعتبر النت عالم كبير وغريب وممتع و سلاح ذو حدين.

تمرر التاج لمين؟
ياااااااااااااااااه حمدلله ع السلامه
تنفسوا الصعداء بقى
نياهاهاهاهاهاهاهاهاهاها
بهدي التاج لـ
لـ
لـ
لـ
الهانم دينا حامد (شفتي بقى دا حسابك العسير مانجا اللي وعدتك بيه ياهانم عشان تبقي تورطيني في تاج قبل كدا وتقولي عني قلبي اسود ودراكولا )
بهديه لموني العسولة
وايدي
ودكتورة نور آهاتي
وانتحاري

وربما اللي يطق كدا في نفوخي ابقى اقوله في مدونته هع هع هع
وياريت متكسفونيش وتكبسوني وتطنشوني زي ما حصل معايا قبل كدا ممكن يعني..
وأخيرا وليس آخرا اعتذر للإطاله
سيداتي وسادتي كنتم مع البرنسيسة بسومة النعومة في" لا تتوج إلا الأميرات"
ألقــــاكم في حلقة قادمة وإلــى اللقاء أحبتي في الله

~~~~~~~~~~~~

شوفوا بقى اللي وصل لآخر البوست يقولي في التعليقات على الأمارة اللي هيا:

يقولي بأمارة اني وصلت لآخر البوست وقريته كله انتي" ذئبه كبننه"

هع هع هع نياهاهاهاهاهاهاها

على فكرة الرسمه بتاعة الأميرة دي أنا اللي رسماها دي أنا

ياخواتي على كمالي