BLOGGER TEMPLATES AND TWITTER BACKGROUNDS »

بوسي

3/01/2009

أول تــــــاج لمدونتي الصغننة



التاج دا جالي من أختي العسولة ((دينـــا حــامد)) صاحبة مدونة كلمـــــــــات

على أساس إنها تورطني بس مش مشكلة يادينا نردهالك في الأفراح
حسابك معايا عسير مانجا ..ماشي ..ماشي

بس على فكرة هتكون ليكي لمسة مميزة في تاريخ مدونتي العظيم بما إنك أول وحدة تهديني تاج

احمدي ربك بقى بقيتي انسانة مهمة هههههههههههه

ومتأسفة يادندن عشان إتأخرت في الجواب على التاج

ندخل بقى على التاج:

ــــــــــــــــــــــــــــــــــــــــــــــــــــــــــــــــ

1_لو ينفع تختار عصر تعيش فيه تختار اي عصر؟ ويبقى مين الحاكم؟

من غير تردد عصر حبيب قلبي محمد صلى الله عليه وسلم.

ـــــــــــــــــــــــــــــــ

2_أول أولويه في حياتك؟

ديني

يمكن مقصرة في حقه بس أكيد هيكون ليا دور عشانه.

ـــــــــــــــــــــــــــــــ

3_اكتر حاجة بتحبها في رمضان؟

والله أنا معمريش جربت رمضان في مصر

فمعرفش جو الفوانيس والمسحراتي واللمة مع القرايب بس حاسة انها حاجات حلوة أوي

ونفسي بجد اجربها

عندنا هنا في السعودية مبيعملوش حاجة

بس بموت في صلاة التراويح وقيام الليل لإني بصليهم في المسجد

وبنتسابق في البيت مين يختم القرآن أكتر من مرة

وكمان بحب رمضان عشان في العشر الآواخر بنروح مكة والمدينة نعمل عمرة ونقضيهم لحد 3 يوم العيد

ادعولنا نروح مكة رمضان الجاي دا

ـــــــــــــــــــــــــــــــــــ

4_اوصف اجمل فطار ممكن تفطره؟

في رمضان يعني

بنفطر بطريقة السعوديين يعني على مرتين

المرة الأولى: لما يأذن بشرب قهوة عربي وتمر مع قشطة وممكن يكون في عصير أو شوربة وسمبوسة أو فطاير

المرة التانية:بعد مانرجع من صلاة التراويح بيكون أكل حقيقي بقى (حلوة أكل حقيقي دي يعني اللي فات كان مزور)هههههه

أنا بقى بموت في المكرونة البشاميل أو محشي و ورق عنب

وأحب أحلي بقى بكنافة أوحلويات اسمها (حلى قهوة منتشرة هنا في السعودية)

اكيد سارة هتعرفهم

اي ده كله دا أنا مفجوعة هههههههه لا والله باكل من كل حاجة شيء بسيط

أنا مش أكولة أوي

ـــــــــــــــــــــــــــــــــــــ

5_لو انت حاكم هتكون عادل؟ وهتعرف ازاي؟

أنما لو قالولي توافقي تكوني حاكم مش هوافق لإن دي مسؤلية كبيرة

وأنا أخاف اظلم من غير قصد ويوم القيامة بقى أروح فيها

بس لو بقيت حاكم رغما عني

فأنا هاخد بالي من أي تصرف هختار مستشارين عقلاء وموثوق فيهم يساعدوني في اتخاذ قراراتي

وعشان اعرف ازاي أنا حاكمة عادلة

هنزل وسط الناس واتظاهر إني منهم وفيهم وأحاول اسحب منهم كلام

ــــــــــــــــــــــــــــــــــــــ

6_مين اكتر اعلامي بتحبه؟

مليش في الموضوع دا

مبتفرجش على التلفزيون كتير

بس أنا بحب الأستاذ عمرو خالد

وإبراهيـــم الفقي

ومنى الشاذلي وبجد نفسي انها تتحجب

يارب تتحجب

ـــــــــــــــــــــــــــــــــ

7_لو ممكن شغلانه تانيه تختار ايه؟

طبعا أنا مازلت مكافحة في الثانوية العامة

بس نفسي بجد أكون صحفية

أو

رســــامة وأكون فنانة جدا واعمل معارض

أو يكون ليا أنا شغل أنا رئيسته وأنا اللي آخد القرارات

مبحبش حد يتحكم فيا (رأيي زيك في الحته دي يادينا)

ــــــــــــــــــــــــــــــــــ

8_تاني بلد تحب تعيش فيه بعد مصر؟

مكة المكرمة

المدينة المنورة

فلسطيــــن (غزة)بالتحديد

تركيا
الهند

ــــــــــــــــــــــــــــــــ

9_اوصف ترتيبات اجمل فرح ممكن تحضره؟

أنا تقريبا حضرت فرحين ثلاثة وكمان زمان

بس أنا من رأيي

يكون فرح منفصل الستات في قاعة لوحدهم والرجالة في قاعة لوحدهم

وفي قاعة الستات تكون الكوشة وتكون كلها ورود حمرا وبيضا

وفل وياسمين

وفي شيفون وتل وديكور بشكل حلو يعني وألوان القاعة كلها أحمر وأبيض

وطربيزات

والناس محترمة وقاعدة بنظام

والأكل يكون حاجات خفافي كدا

جاتوه وعصير

وأناشيد فرح إسلامية هادية

ويزف العروسة والعريس للكوشة بنات لبسين فساتين بيضة وماسكين شمعادانات بلون أحمر

(بس ياخدوا بالهم لتقع منهم شمعة ويولعوا في الدنيا والفرح يبقى موتة)

طبعا العريس يقعد شوية بعدين يمشي عند الرجالة عشان الستات تاخد راحتها

وبعدين ميكونش الفرح لوقت متأخر

اعتقد حلو لو كان من بعد صلاة العشا عشان الناس تكون صلت وخلصت فالصلاة مش هتضيع

للساعة 11 أو 12 بالليل

بس خلاص خلصت

ياه دا أنا زودتها أوي

ـــــــــــــــــــــــــــــــــ

9_بتراعي كلام الناس والقيل والقال؟ وليه؟

أنا بيهمني كلام عيلتي وأصحابي والناس اللي بحبهم وبيحبوني

ليه؟

لإنهم لما بيتكلموا

هيتكلموا لمصلحتي

لكن مليش دعوة بكلام الناس طول ما أنا صح

بس ممكن كلامهم يجرحني واعيط (بيني وبين نفسي) لإني حساسة جدا ودمعتي بتغلبني

بس بردو هطنش

ـــــــــــــــــــــــــــــــــ

10_صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟

يمكن هتصدم أوي لإن في ناس كتير بحبهم علاقتي مرتبطة بيهم عن طريق الحاجات دي

فهفتقدهم جدا
وكمان مدونتي حبيبتي هتوحشني أوي

بس هعمل ايه هحاول اتأقلم والحمام الزاجل بردو حلو وعسول

وأنا نفسي اركب حصان

ههههههههههه

ــــــــــــــــــــــــــــــــ

11_السعادة هي؟

رضـــا ربنا عني

ورضا بابا وماما

وأكون راضية عن نفسي

وإني أكون مع أحب الناس ليا

وصحتي طبعا

والرضا بالقضاء والقدر

ــــــــــــــــــــــــــــــــ

12_عندك امل؟ واسبابك؟

اه عندي

عشان ربنا موجود

وكمان لما بفقد الأمل

عندي حبايبي بيساعدوني

ويرجعهولي تاني

ــــــــــــــــــــــــــــــــ

13_لما تحب تهرب من كل حاجة بتروح فين؟

بطلع السطح وأناجي ربنا واتكلم معاه

ساعتها برتاح أوي

وكمان ساعات كتير بنام عشان اهرب ومفكرش فأي حاجة

ــــــــــــــــــــــــــــ

14_امتى اخر مرة خدت فيها نفس وقولت يااااااه انا كبرت؟

الإسبوع اللي فات

طلعت السطح على الفجر وبصيت لقيت مدرستي الإبتدائية اللي كنت بدرس فيها

قلت ياااااااااااااااااااااه دا أنا كبرت

ياريت ارجع تاني صغيرة واروحها تاني

ــــــــــــــــــــــــــ

15_بتشرب سجاير ولا لا؟ وايه رايك في الرجاله والستات اللي بيشربوا سجاير؟

اه اكيد بشرب لازم اعمل مزاج كمان

هههههههههههههه

طبعا لأ

وبكره السجاير وبحتقر أي شاب اشوفه بيشربها

وبتفرس من الستات كمان

لكن الرجاله الكبار بزعل عليهم أوي

لإنهم اتعودوا عليها من زمان

وبدعيلهم يسيبوها

ـــــــــــــــــــــــ

16_بتعرف ايدك الشمال ازاي؟

لو كنت صغننة كان ممكن أقول اني بتلخبط بينهم

لكن دلوقتي أنا كبننة

وعارفة الشمال من اليمين

وايدي الشمال اللي مش بستعملها دايما
بسيطة يعني

ـــــــــــــــــــــــــ

17_اكتر آله موسيقية بتحبها؟

اكسليفون

هارمونيكا

بحبهم جدا

ـــــــــــــــــــــــــــ

18_ليه الذوق والنخوة اتعدموا؟

هما متعدموش

بس قلوا عشان الناس قل دينها

بس والله الدنيا لسا فيها خير

طول مافي ناس زيكوا كدا

ـــــــــــــــــــــــــــ

19_ايه الحاجات اللي لو حصلت هتبقى سعيد؟

  1. ربنا يرضى عني ويوفقني في حياتي.
  2. ماما وبابا يرضوا عني بجد نفسي في كدا.
  3. اشوف الرسول في رؤيا.
  4. شأن الأمة الإسلامية يبقى عالي في الدنيا كلها.
  5. تتحرر كل البلاد الإسلامية المحتله.
  6. معبر غزة يتفتح ونزور المسجد الأقصى.
  7. أكون انسانة ليها قيمة تنفع دينها ووطنها.
  8. ربنا ميفرقنيش عن أغلى الناس عندي.
  9. إن مصر ترجعلها هيبتها زي زمان وتتحسن أوضاعها.
  10. لما أشوف زوزو (زينب) صاحبة مدونة نور الحياة

في الكوشة سعيدة ومبسوطة وتحصلها (مرمر) ههههههههههههه .

في حاجات كتير كفاية دول بقى

ــــــــــــــــــــــــــــــــــــــ

20_تحب ارض زراعية ولا اجنس عربيات ولا كام عمارة ولا فلوس في البنك؟

مبحبش الماديات ولا أحب أكون غنية الفلوس بتغير الواحد

بس لو هختار اختار فلوس في البنك أشتري بيها أرض زراعية وابني فيها بيت

وازرع في الأرض ورد كتير واعمل مرجيحه وأعيش هناك وآخد الناس اللي بحبهم معايا.

ياااااااااااااااه أحلى حاجة.

ـــــــــــــــــــــــــــــــــــــــ

21_تحب البحر ولا النيل؟

كل واحد ليه احساس معايا غير التاني

يعني بموت فيهم هما الإتنين

بس بخاف منهم أوي

خاصة البحر لإني مرة كنت هغرق فيه فعلاً

ــــــــــــــــــــــــــــــــــ

22_مركب ولا طيارة؟

مركب طبعاً

ــــــــــــــــــــــــــــــــ

23_شخص مجنون ولا عاقل؟

الإتنين بس الجنون بيغلب ههههههههه.

مش جنون أوي

بس على حسب المود بتاعي

ـــــــــــــــــــــــــــــــ

24_تقرا كتاب ولا تتفرج على فيلم؟

بردو على حسب المود بتاعي

بس لو هشوف فيلم مش هيكون أي فيلم

حاجة هادفه كدا يعني.

ـــــــــــــــــــــــــــــــــ

25_تهدي التاج لمين؟

اممممممممم

مواهاهاهاهاهاهاهاها (ضحكة شريرة جدا)

أول خمسة هيعلقوا عندي بهديهم التاج دا

ولازم يجاوبوا عليه لإني هتابع وهشوف

أما بقى من ناحيتي فأنا بختار

كاتب مصــري_مــرمـر_إسلام ديو

flower girl

محدش يزعل مني من اللي مقلتش اسمائهم بس أنا حبيت أورط الكماحة دول

~~~~~~~~~~~~~~~~





ألقاكــــــــــــــــــــــم





21 التعليقات:

*shosho* يقول...

أول تعليق يابسومة
بس مش هجاوب عالتاج
غلاسة شوشو المعهودة بقى
ـــــــــــــــــــ
التاج جميل وأجوبتك عليه حلوة

تحيتي مش لك يا بسبس ناو
للمدونة اللي جنبك
ههههههههههههههههههههه

smart_mody يقول...

السلام عليكم

اسئلة حلوة كتير بس الاجوبة اروع وكتير بسيطة

عارفة انا بالاخر لما فهمت شو يعني التاج هههههه

اما مو شايف ولا كومنت يمكن يكونو مو ظاهرين او يا خوفي ما اكون من الاوائل ههههه

ربنا يوفقك قلبك ابيض
ادعيلي كمان مرة اخلص هالكتاب هههههههve

ادم المصرى يقول...

الف الف الف مبروك على اول تاج لمدونتك

بس بجد اجباتك كانت فى منتها الروعه والدقه

بس لاسئله كانت هينه شويه ولزيزه فى نفس الوقت

حازم سويلم يقول...

عزيزتى بسمة

رغم انى لا احب موضوع التاج لنمطيته الشديدة, الا ان اجاباتك نجت من فخ النمطية والقولبة والتكرار, بجد استمتعت بردودك على الأسئلة, وشعرت بخصوصيتها

تحياتى

اسلام الشربينى يقول...

بسم الله الرحمن الراحيم

انا بقى زهقان من مصر وعاوز اروح السعودية عشان كل قاريبى اللى بحبهم هناك


وشكرا يا بسمة جدا عشان زورتينى فى المدونة بتاعتى بس غصب عنى الرد جة متأخر عشان مشغول فى ثالثة سانوى حبة


والحمد لله طلعت الخامس عشان التاج :d

تحياتى ليكى وبعد ازنك سأكون صديق للمدونة الحلوة دى

دينا حامد يقول...

اجاباتك حلوة جدا
بصراحة اوقات كتير بحس انك اكبر من سنك زيي كدة D:
ربنا يكلمك بعقلك يامعلم

وان شاء الله انا بدعي لك تيجي تقضي مرة رمضان في مصر ووعد مني هشغلك مسحراتي يلا مش حرماكي من حاجة اهو

تحياتي ياكبننه

salah يقول...

ربنا يوفقك يابنتي ويسعدك في الدارين ويحقق لك أحلامك انت ومأة وباقي العائلة ويجمعكم في الجنة مع من تحبون فهي أمل المتحابين
مح تحيات أبي الشمقمق

لجين أبو الدهب يقول...

انا شفت اهداء التاج فى مدونات تانية ..

بس اجاباتك ما شاء الله عجبتنى ..

بس انتى عايشة فين فى السعودية ؟؟ يمكن اكون قريبة منكم ..

ربنا يبارك فيكى ويحفظك لمامتك وباباكى وان شاء الله تقضى رمضان مرة فى مصر جميل اوى ..

دمتِ بخير الحبيبة بسمة ..

@عاشقة القمر@ يقول...

يعطيكي العافيه
وبراااااااااافووووووووووو
قدرتي تجاوبي علي الاسئله
دنتي كنتي بجد مرعوبه كنت شايله همك والله ههههههههههه وبالنسبه للمعبر ادعيلو هههههههههه
انا مش عارفه ليه بس الاسئله حلوة
تحيــــــاتي

BAsMA يقول...

بسمة
ازيك انا مبسوطة جدا اننا قد بعض وزمايل كمان مبسوطة بجد
انشاء الله هنبقى اصحاب صح؟

اجاباتك عجبتنى جدا ولو كنت مكانك كنت هجاوب نفس اجاباتك تقريبا

اصحى يا مصر : اسلام ديو يقول...

اشكرك جداً جداً يا بسمة وانا اسف ان ردى جه متأخر ، بس صدقينى كان نفسى احتفظ بأول تعليق بس انتى عارفة التعليقات ارزاق ورزقت بيه الاخت shosho

بصراحة انا فرحان جداً جداً بأهداءك التاج ليا ودا شرف كبير اوى هحتفظ بيه كوسام فى قلبى

اشكرك مرة تانية اختى العزيزة

سلامى وتحباتى

كاتب مصري يقول...

م عن شخصية واعية وحساسة وعاقلة جدا
ربنا يوفقك
بجد انتي مثال للبنت المحترمة المتدينة فعلا والي بقى نادر وجود زيك اليومين دول
ربنا يكتبلك الخير
مودتي

fL0weR-giRL يقول...

السلام عليكم بسوم

شكرا ليكي

وعلي ذوقك

وهرد عليه ان شا ء الله عن قريب

بـسـمـــة صـــــلاح يقول...

السلام عليكم ورحمة الله وبركاته
~~~~~~~~~~~~~~~~~~~~~~~~~~~
((للخمســــ5ـــة الأوائل التاج)))
1_*shosho*:

هتفضلي رخمه طول عمرك
ههههههههههههههه
ـــــــــــــــــــــــــــــــ
smart_mody:

شكرا لحضرتك
اه حضرتك كدا أخدت التاج
شرفتني بمرورك الكريم
ـــــــــــــــــــــــــــــــ
3_ ادم المصرى:
اللـــه يبارك في حضرتك ياأستاذ آدم
ربنا يكرمك
شكرا لمرورك
نورتنيـ
ــــــــــــــــــــــــــ
4_حازم سويلم:

ربنا يكرمك ياأستاذ حازم
انا جاوبت اللي تمليه عليا شخصيتي
نورتني بمرورك
ــــــــــــــــــــــــــ
5_اسلام الشربيني:
اهلا بيك في المدونه في اي وقت
مش مشكله ربنا يوفقك ويعينك في الدراسه
ويعينا احنا كمان
اه التاج ليك
شرفني مرورك
ــــــــــــــــــــــــــــــ
دينا حامد:

نورتي يامعلمه ههههههههههه
بقى كدا مش مكفيكي تورطيني كمان هتشغليني مسحراتي
هاخدك معايا وتلفي ورايا ههههههههههه
بس اشمعنى اكبر من سني
هيييييييييييي
اول مرة احس ان انا كبيرة ياناس
هههههههههههههه
نورتني ياعسوله
ـــــــــــــــــــــــــــ
salah:

ربنا يسعدك ياأحلــــى بابا
ويجمعنا كلنا سوا في الجنه
نورتني يابابتي
ـــــــــــــــــــــــــــ
لجين أبو الدهب :

ربنا يخليكي يالوجي ياحبيبتي
ان شاء الله ادعيلي
نورتيني يالوجي والله
ـــــــــــــــــــــــــــ
@عاشقة القمر@:

ضلمتي ضلمتي ضلمتي
يا إيمااااااااااان
ههههههههههههههه
ياندله تروحي المدرسه وتسيبيني بقى كدا
مش تقوليلي انك رايحه
ماشي ماشي
حسابك عسير فراوله
هههههههههههه
ــــــــــــــــــــــــــ
BAsMA :
طبعا يابسومة نكون اصحاب
دي حاجه تفرحني اكيد
وبما ان اجاباتك هتكون زيي
يبقى بقينا واحد على كدا
ايه ده يابسمه لنكون نسخ كربون واحنا منعرفش
هههههههههههههه
دمي يلطش
ههههههههههه
نورتيني يابسومة
ـــــــــــــــــــــــ
اصحى يا مصر : اسلام ديو:

لاشكر على واجب(محترم أوي الواجب دا)
مش مشكله ولا يهمك
ربنا يديم عليك الفرحه يااستاذ اسلام
امين يارب
هستنى الاجابات
شرفتني بمرورك
ــــــــــــــــــــــ
كاتب مصري:

ربنا يكرمك ويسعدك دا من زوق حضرتك
ويكتبلك الخير يارب
نورتني بمرورك الكريم
ــــــــــــــــــــــ
fL0weR-giRL :
شكل الورطه كانت هديه ياعيال
هههههههههههههههههههه
ازيك يافلاور عامله ايه
هستنى الاجابات لما نشوف
نورتيني ياسكورة
ــــــــــــــــــــــــــــــــــ
نورتوووووووووووني كلكوااا
ربنا يسعدكم دنيا واخرة

ألقاكــــ بسومــةــــــم

بنوتة يقول...

السلام عليكم
جميل اجاباتك
لابنا يوفقك ويحققلك كل أحلامك
تحياتى
وسلا يا بسبس
حلوة بسبس؟

aidy يقول...

جميل التاج يا بسمة

أجاباتك حلوة اوى

انا ممكن اعملك تاج تانى

ايه رأيك :)

zainab يقول...

حبيبة قلبى بوسى

وحشتينى قوى يا بت يا بوسى

ايه انا ما وحشتكيش ؟؟؟؟؟؟؟؟؟

التاج جميل يا بوسى مبروك عليكى عقبال تاج الفرح يارب
بوسى على فكرة أنا بموووووووووووووووووت فى محشى ورق العنب و المكرونه بالبشاميل يااااااااااااه بمووووووووت فيهم بجد فكرتينى ليه يا بوسى انا عايزة أكل ماليش دعوة هه بأه

الله يخليكى ليا يا بوسى و أما أشوف هتيجى ان شاءالله فرحى

ادعيلى يا بوسى ربنا يبارك لى فى خطيبى ييسر لنا الحال و يهدينا و يوفقنا

و ابقى رنى عليا رنتين لما تفتحى الشات ان شاء الله

تحياتى

المعتصم يقول...

بسم الله الرحمن الرحيم
السلام عليكم
تحياتى
انا شفت التاج اول مانزلتيه وماكنش حد علق خالص
بس انتى كنتى كاتبه انك هتهدى التاج ده لاول تلاته هيعلقو هندك
وبما انى ليا ذكريات مش ظريفه مع التاجات اللى زى كده فطبعا انا خفت فمرضيتش اعلق خالص
بس ادى كل الموضوع (والبركه فى زينب فى الموضوع ده)
يلا ســـــــــــــــلام

صفـــــاء يقول...

.
بسمه الجميله وأول معرفتى بيها
سعيدة جدا بيكى وبمعرفتك
وربنا يردك لبلدك بالسلامه عشان تحسى بجو رمضان وبكل حاجه حلوة فيها ويبعد عنك أى حاجه وحشه ممكن تشوة صورتها فى عينك
تاج حلو زيك يا قمر وأجاباتك كلها جميله وأن شاء الله تقضى رمضان السنه دى وكل سنه ألى جوار بيت الله الحرام وقبر حبيبه رسول الله
.

bar2ash يقول...

السلام عليكم

ازيك يا بسمه

زيارتك عندي اسعدتني

والتاج اجاباتك عليه جميله بس (طوييييله) متزعليش مني
اصلي قرأت التاج وانا لسه جاي من السفر
بس بجد قرأته كله


انتي حد لذيذ بجد
وليكي مستقبل

ربي يوفقك

برقش

ranim يقول...

اجباتك تهبللللللللل ما شاء اللة ومبروك التاج


تحياتي مبتسمة دائما